Azərbaycan, Bakı, 21 yanvar / Trend , müxbir K.Zərbalıyeva/
Azərbaycan polisi külli miqdarda narkotiki qanunsuz dövriyyədən çıxarıb.
Daxili İşlər Nazirliyinin mətbuat xidmətindən verilən məlumata görə, Baş Mütəşəkkil Cinayətkarlıqla Mübarizə İdarəsi əməkdaşlarının keçirdikləri əməliyyat-axtarış tədbirləri nəticəsində Şirvan şəhər sakini Mübariz Heybətov əvvəllər məhkum olunmuş qohumu Cavid Əmirovla marixuana satarkən tutulub.
Narkotiki Heybətovun həyətyanı sahəsində kultivasiya yolu ilə yetişdirdiyi çətənə kollarından hazırladığı məlum olub.
Onlar 1 kiloqram 214,03 qram marixuananı 2 500 dollara satarkən tutulublar.
Bakının Yasamal rayon Polis İdarəsi əməkdaşlarının keçirdikləri əməliyyat tədbirləri nəticəsində şəhər sakini Fərman Əliyevdən narkotik vasitə olan 45,07 qram marixuana aşkar edilərək götürülüb.
Aparılmış əməliyyat-axtarış tədbirləri nəticəsində Əliyevin evinə baxış zamanı külli miqdarda - 3 kiloqram 412,86 qram narkotik vasitə olan marixuana aşkar edilərək götürülüb.
Hər iki faktla bağlı cinayət işi başlanıb, istintaq aparılır.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
