Azərbaycan, Bakı, 16 iyun /Trend, müxbir K.Zərbalıyeva/
Azərbaycanın müdafiə naziri NATO baş katibinin xüsusi nümayəndəsi ilə Dağlıq Qarabağ münaqişəsini müzakirə edib.
Müdafiə Nazirliyinin mətbuat xidmətindən çərşənbə günü Trend-ə verilən məlumata görə, iyunun 16-da müdafiə naziri general-polkovnik Səfər Əbiyev NATO baş katibinin xüsusi nümayəndəsi Robert Simonsu qəbul edib.
Görüşdə Azərbaycan - NATO əməkdaşlığı, regionda hərbi-siyasi vəziyyət və Dağlıq Qarabağ münaqişəsi barədə müzakirələr aparılıb.
1996-cı ilin aprelində "Sülh naminə tərəfdaşlıq" proqramı çərçivəsində rəsmi sənəd imzalanıb. Bu sənəd qarşılıqlı fəaliyyətin konkret istiqamətlərini müəyyən edir. Hazırda Azərbaycan bu proqrama uyğun olaraq onun üzərinə düşən 50-yə yaxın tərəfdaş vəzifəsini yerinə yetirir.
2005-ci il avqustun 3-də Azərbaycan Prezidenti İlham Əliyev Azərbaycan Respublikası ilə NATO arasında fərdi əməkdaşlığa dair fəaliyyət planının təsdiq edilməsi haqqında sərəncam imzalayıb.
Hazırda əməkdaşlıq planın ikinci mərhələsi çərçivəsində həyata keçirilir.