Azərbaycan, Bakı, 3 noyabr /Trend, müxbir T.Hacıyev/
Azərbaycandakı demək olar ki, bütün seçki məntəqələrinə artıq seçki bülletenləri paylanılıb. Bu barədə çərşənbə günü Trend-ə Mərkəzi Seçki Komissiyasının mətbuat xidmətinin rəhbəri Azər Sarıyev məlumat verib.
Onun sözlərinə görə, bu gün MSK-nın öncədən hazırladığı təqvim planına əsasən bülletenlərin DSK-lara paylanmasının sonuncu günüdür.
Azərbaycanda 5 milyondan artıq seçki bülleteni çap olunub. Bu da ümumi seçici sayından 3 faiz artıqdır.
Azərbaycanda parlament seçkiləri noyabrın 7-də keçiriləcək. Sentyabrın 3-də seçkilərə rəsmi start verilib.
Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində aparılır.