...

İran da Misir və Tunis kimi islahatlar aparmaq məcburiyyətindədir - ekspert

Siyasət Materials 15 Fevral 2011 13:23 (UTC +04:00)
İran da  Misir və Tunis kimi islahatlar aparmaq məcburiyyətindədir - ekspert

Azərbaycan, Bakı, 15 fevral /Trend, müxbir T.Cəfərov/

İran xalqının demokratiya və azadlıq əldə etmək istəyi heç vaxt bitməyəcək. Gec-tez İran da Misir və Tunis kimi islahatlar aparmaq məcburiyyətindədir. Bunu Qlazko (Glasko) Universitetinin professoru, Britaniyada fəaliyyət göstərən iranlı ekspert Rza Təqizadə telefonla Trend-ə deyib.

Təqizadə ötən gün İranda baş vermiş nümayişləri ölkədə demokratiya və azadlıq istəklərinin mövcudluğunun göstəricisi kimi dəyərləndirib.

"İran xalqının dünənki nümayişləri başlanmış hərəkatın davamıdır. Bu hərəkat bəzən sakit, bəzən isə daha aktiv olub. Bu, onu göstərdi ki, ölkədə demokratiya arzusu hələ də var və əhali həqiqətən azadlıq əldə etmək istəyir", - Təqizdə deyib.

İranın müxalifətyönlü İnternet saytlarının məlumatına əsasən, ötən gün Tehranda və İranın digər şəhərlərində müxalifət Misir və Tunis xalqlarına dəstək aksiyası keçirmək istəyib. Nümayişçilərlə polis arasında toqquşmalar baş verib. İran polisi Tehranda keçirilən aksiya iştirakçılarını dağıtmaq üçün gözyaşardıcı qazdan istifadə edib. Qarşıdurma nəticəsində azı 1 nəfər ölüb, onlarla insan yaralanıb, 200-dən artıq etirazçı isə saxlanılıb.

İranın MEHR xəbər agentliyinin məlumatına əsasən, ötən günkü hadisələrdə 1 nəfər həlak olub, bir neçə nəfər yaralanıb, onlardan birinin vəziyyəti ağırdır. İran Polis Komandanlığının rəis müavini Əhmədrza Radan ötən günkü hadisələrdə 9 polis əməkdaşının yaralandığını bildirib.

Təqizadə əlavə edib ki, İran, Misir və Türkiyə regionun böyük ölkələrindəndirlər. Bu üç ölkədə baş verən hadisələr Yaxın Şərqdə baş verən hadisələrə təsir göstərir. Eləcə də, bu üç ölkənin hər birində baş verən proseslər digər iki ölkəyə birbaşa təsir edir.

Yanvarın 25-də Misirdə sonradan kütləvi iğtişaşlara çevrilən hökumət əleyihə aksiyalar keçirilməyə başlayıb. Azı 300 nəfər həlak olub, orta hesabla 5 min nəfər xəsarət alıb. Nümayişçilər Qahirənin Təhrir meydanına yığışmaqda və Mübarəkin dövlət başçısı vəzifəsindən getməsini tələb ediblər. 18 gün davam edən etirazlardan sonra Hüsnü Mübarək istefa verdi.

Misirdən əvvəl Tunisdə xalqla hökumət qüvvələri arasında baş verən çaxnaşmadan sonra bu ölkənin prezidenti ölkədən qaçdı.

Təqizadənin fikrincə Misirdə və Tunisdə aparılan islahatlar regionun digər ölkələrində də baş verəcək.

"Yaxın Şərq ölkələrinin əksəriyyətində belə islahatların olacağı gözləniləndir, lakin hansı ölkədə tez olacaq - bunu hələlik demək olmur. Ona görə ki, bu dəyişikliklərin heç biri bir-birinə bənzəmir, lakin bir-birlərindən təsirlənirlər. Dəyişikliklərin hansı ölkədə baş verəcəyi bilinməsə də, İran əsas namizədlərdən biridir", - Təqizadə deyib.

Xəbər lenti

Xəbər lenti