Azərbaycan, Bakı, 25 may /Trend müxbir T.Cəfərov/
İranda hakim Mühafizəkarlar düşərgəsində baş verən daxili çəkişmələr və Əhmədinejadın prezidentlik dövründə "qanun pozuntuları"na yol verilməsi ittihamının İranın Məhkəmə Sistemində araşdırılması onun hakimiyyətinini ciddi problemlərlə üzləşdirə bilər. Bunu Trend-ə İran Jurnalistlər Birliyinin keçmiş sədri, sabiq deputat və daxili məsələlər üzrə ekspert Əli Məzrui deyib.
"İranın Məhkəmə Sistemi tərəfindən (Judicial system of Iran) ölkə Prezidenti Mahmud Əhmədinejadın yol verdiyi "qanun pozuntuları"nın sübuta yetirilməsi Əhmədinejadın parlamentdə impiçment edilməsi və onun prezidentlik səlahiyyətlərinin ləğv olunması ilə nəticələnə bilər", - Məzrui deyib.
İranın Məhkəmə Sisteminin sözçüsü və Baş prokuror Qulamhüseyn Möhsini Əjeyi jurnalistlərə açıqlamasında bildirib ki, İran parlamentinin Məhkəmə Sisteminə Prezident Mahmud Əhmədinejadın "qanun pozuntuları" ilə bağlı ünvanladığı məktub hazırda araşdırılır və baxılır.
Əjeyi deyib ki, prezidentin "qanun pozuntuları" bir neçə istiqamətdədir və onların hər birinə öz sahələrinə uyğun baxılır. İran parlamentinin Konstitusiyanın 90-cı maddəsinin icrası üzrə komissiyasının üzvü Fazil Musəvi ötən həftə bildirmişdi ki, İran parlamentinin 12 nümayəndəsi dövlətin 50 dəfə "konstitusiyanın tələblərinə zidd addımlar (qanun pozuntuları)" atması ilə bağlı parlamentin Rəyasət Heyətinə şikayət ərizəsi təqdim edib. İran Konstitusiyasının 90-cı maddəsinin tələbinə görə, hər bir kəs parlamentin, dövlətin, məhkəmə sisteminin işindən şikayətçi olarsa, yazılı formada öz şikayət ərizəsini parlamentə təqdim edə bilər. Komissiya şikayət ərizəsini araşdırmaq üçün İranın Məhkəmə Sisteminə göndərib.
Məzruinin fikrincə, Əhmədinejadın prezidentlik dövründəki "qanun pozuntuları" son iki ildə daha da artıb. "Əhmədinejad bundan əvvəl də qanun pozuntularına yol verirdi, lakin son iki ildə bu qanun pozuntuları daha da artıb və hakim düşərgədə baş verən daxili çəkişmələr onun işinin məhkəməyə göndərilməsinə səbəb olub", - Məzrui deyib.
Ötən həftə hakim Mühafizəkarlar düşərgəsində Əhmədinejada yaxın və onunla çalışan şəxslərə qarşı həm siyasi, həm də iqtisadi ittihamlar irəli sürülüb və bir neçə nəfər həbs olunaraq onlara qarşı cinayət işi açılıb.
Aprelin 17-də Əhmədinejad milli təhlükəsizlik naziri Heydər Müslehinin istefasını qəbul etsə də, ali lider ayətullah Xamneyi onun vəzifəsindən uzaqlaşdırılmasına mane oldu. Əhmədinejada qarşı sərt tənqidlər və onun yaxınlarına qarşı ittihamlar da elə bu ixtilafdan sonra səsləndi. Həmin vaxt Əhmədinejad 10 gün işə çıxmaqdan imtina etmişdi və Nazirlər Kabinetinin iki iclası prezidentin iştirakı olmadan keçirilmişdi. Parlament nümayəndələri Əhmədinejada impiçmentlə bağlı xəbərdarlıq etmişdilər və nəhayət o, mayın 1-də işinə qayıtmışdı. Bir çox deputatlar, dini şəxsiyyətlər və İran İslam İnqilabı Keşikçiləri Korpusu Əhmədinejadı milli təhlükəsizlik nazirini işindən uzaqlaşdırmasına görə sərt tənqid ediblər. Onlar Prezidenti ali liderə tabe olmağa çağırıblar.
Əhmədinejad və ali lider arasında fikir ayrılıqları əvvəllər də olub. 2009-cu ilin iyulunda Xamneyi İranın birinci vitse-prezidenti İsfəndiyar Rəhim Maşeyini istefaya göndərmişdi. Prezident isə sonradan Maşeyini öz administrasiyasının rəhbəri təyin etmişdi. Mahmud Əhmədinejad və İsfəndiyar Rəhim Maşeyi qudadırlar.
