Azərbaycan, Bakı, 6 iyul / Trend, müxbir E.Tarıverdiyeva /
ATƏT-in Dağlıq Qarabağ münaqişəsinin nizamlanması üzrə Minsk qrupunun Rusiya, Fransa və ABŞ-dan olan həmsədrləri İqor Popov, Bernar Fasye və Robert Bradtke gələn həftə regiona gələcəklər. Bu barədə Trend-ə diplomatik mənbə məlumat verib.
"Səfərin dəqiq tarixi hələlik müəyyən olunmayıb, lakin hər halda o, gələn həftə baş tutacaq", - mənbə deyib.
Onun sözlərinə görə, Minsk qrupunun həmsədrləri Moskvada məsləhətləşmələr aparmağı planlaşdırırlar və bundan sonra regiona növbəti səfər edəcəklər.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.