Azərbaycan, Bakı, 4 oktyabr /Trend/
RF və Azərbaycan Rusiyanın raket hücumundan müdafiə sisteminə daxil olan Qəbələ RLS-dən istifadə haqqında sazişin müddətinin uzadılması barədə danışıqlar aparırlar. Trend-in məlumatına görə, bu barədə kosmik qoşunlar komandanı general-leytenant Oleq Ostapenko çərşənbə axşamı mətbuat konfransında bildirib. Məlumatı İTAR-TASS yayıb.
Qəbələ RLS-dən istifadənin perspektivləri haqqında sazişin müddətinin 2012-ci ildə başa çatması ilə bağlı suala cavab verən Ostapenko deyib ki, danışıqlar prosesi gedir. "Bu yaxınlarda rusiyalı nazir Anatoli Serdyukov Azərbaycanda olub, - komandan deyib. - O, ölkə prezidenti və müdafiə naziri ilə danışıqlar aparıb".
Ostapenkonun sözlərinə görə, "Azərbaycan bu RLS-lə bağlı müəyyən tələblər irəli sürüb". "Onunla bağlı danışıqlar gedir", -komandan qeyd edib.
Qəbələ radiolokasiya stansiyası Rusiyanın raket hücumundan xəbərdarlıq sisteminin tərkib hissəsidir.
Stansiya Azərbaycanın Qəbələ rayonunun yaxınlığında yerləşir. RLS SSRİ-nin raket əleyhinə sisteminin ən vacib elementi olub. Azərbaycan müstəqillik əldə etdikdən və RLS onun mülkiyyətinə keçdikdən sonra Rusiya Azərbaycanın daxili siyasi həyatındakı gözlənilməz hadisələrə baxmayaraq, stansiyadan istifadəni davam etdirib.