Azərbaycan, Bakı, 28 mart /Trend, müxbir E.Mehdiyev/
Azərbaycan Demokrat Partiyasının sədri müxalifətin yeni formatda əməkdaşlığının o qədər də uğurlu olacağını gözləmir.
"Bu, AMİP-in təşəbbüsü ilə olan bir görüş idi. Məqsəd də bu beş partiya arasında ən azı siyasi diskusiyalar təşkil etmək və mühüm məsələlərlə bağlı problemlərin araşdırılmasına nail olmaqdır. Və biz qərara gəlmişik ki, bu cür məsələlər ətrafında görüşək və müzakirələri davam etdirək", - bunu çərşənbə günü Trend-ə açıqlamasında ADP sədri Sərdar Cəlaloğlu deyib.
Lakin "beşlik" adlandırılan yeni formatda təmsil olunan AXCP və Müsavat ilə mövqelərinin kəskin şəkildə fərqləndiyini bildirən Cəlaloğlu yeni formatla bağlı o qədər də böyük ümidləri olmadığını deyib.
"Mənim AXCP və Müsavat ilə mövqeyim üst-üstə düşmür. Çünki mən, ümumiyyətlə, müxalifətin yeni siyasi texnologiyaları tətbiq etməsinin tərəfdarıyam. Onlar isə belə hesab edir ki, indiyə qədər müxalifətin siyasi texnologiyaları kifayət edir, ona görə də yenilərinə ehtiyac yoxdur. Bu baxımdan çox kəskin şəkildə bir-birimizdən fərqli mövqedəyik", - partiya sədri bildirib.
Ona görə də müsbət ümidlərinin olmadığını deyən Cəlaloğlu qeyd edib ki, hər halda olmamaqdansa nəyinsə olmasını məqsədəuyğun hesab edir.
"Biri var ki, bu partiyalarla heç bir əlaqə yoxdur, ən azı öz aralarındakı adi bir məsələni belə müzakirə edə bilmirlər. Ona görə də düşünürəm ki, belə daha yaxşı olar", - partiya sədri deyib.
Qeyd edək ki, ötən həftə müxalif partiyaları yeni formatda görüş keçirib. "Beşlik" formatında keçirilən görüşdə ADP sədri Sərdar Cəlaloğlu, Müsavat başqanı İsa Qəmbər, AXCP sədri Əli Kərimli, KXCP sədri Mirmahmud Mirəlioğlu və AMİP sədri Yusif Bağırzadə iştirak edib. Bu cür görüşlərin ayda ən azı iki dəfə keçirilməsi qərara alınıb.