Azərbaycan, Bakı, 3 iyun /Trend, müxbir R.Hafizoğlu/
Türkiyədə etiraz aksiyalarının davam etməsi müxalifət qüvvələrinin hökumət əleyhinə koalisiya yaratması ilə nəticələnə bilər. Bu barədə bazar ertəsi Trend-ə türkiyəli ekspert Nevzat Çiçək bildirib.
Onun sözlərinə görə, bəzilərinin hesab etdiyi kimi, Türkiyə şəhərlərində keçirilən etiraz aksiyaları iqtisadi xarakter daşımır.
Bir sıra Türkiyə KİV-ləri yazır ki, müxtəlif şəhərlərdə keçirilən etiraz aksiyalarının səbəbi Ərdoğan hökuməti tərəfindən spirtli içkilər və tütün məmulatlarına qarşı sərt mübarizənin aparılmasıdır.
Ekspert bildirib ki, Taksim Gezi parkının məhv edilməsinə qarşı keçirilən aksiyalar hazırda hökumətin devrilməsinə yönəlib.
O, hesab edir ki, əgər hökumət mövqeyini dəyişməsə və ya güzəştlərə getməsə, onda ölkədə vəziyyət daha da gərginləşə bilər.
Ölkə DİN-in məlumatına görə, Türkiyədə qarşıdurmalar nəticəsində 58 nəfər xəsarət alıb, 730 nəfərdən artıq insan saxlanılıb.
Türkiyə mətbuatının məlumatına görə, hazırda müxtəlif şəhərlərdə etiraz aksiyaları davam edir.