Azərbaycan, Bakı, 3 oktyabr /Trend, müxbirlər A.Bədəlova, N.Ümid/
İranın nüvə proqramı ətrafında münaqişənin həlli İran və ABŞ arasında qarşılıqlı maraq və hörmətə əsaslanacaq yeni münasibətlərin qurulması yolunda böyük addım olacaq. Bu barədə cümə axşamı Trend-ə ABŞ Dövlət Departamentinin nümayəndəsi Alan Eyr deyib.
İki ölkə arasında birbaşa danışıqların aparılması imkanlarından danışan A.Eyr qeyd edib ki, ABŞ Prezidenti Barak Obama dəfələrlə xatırladıb ki, Birləşmiş Ştatlar həm bilavasitə İranla, həm də "P5+1 qrupu" çərçivəsində danışıqların davam etdirilməsində maraqlıdır.
A.Eyrin sözlərinə görə, B.Obama İranın ali dini lideri Əli Xamneyi və Prezidenti Həsən Ruhaniyə göndərdiyi məktublarda bildirib ki, İranın nüvə məsələsinin həllində maraqlıdır.
O deyib: "ABŞ israr edir ki, İran nüvə silahı istehsal etməməlidir. ABŞ İranda rejim dəyişikliyini istəmir, çünki ölkə İran xalqının dinc məqsədlər üçün atom enerjisi əldə etmək hüquqlarına hörmət edir. İran Nüvə Silahının Yayılmaması Müqaviləsini imzalayıb və bu müqavilə çərçivəsində öz öhdəliklərinə əməl etməlidir".
A.Eyr əlavə edib ki, İran hazırda ABŞ və beynəlxalq ictimaiyyətdən yalnız bir ümumi səs eşitməlidir: "Bu səs deyir ki, İran öz nüvə öhdəliklərinə əməl etməli və ölkənin nüvə proqramı ilə bağlı bütün narahatlıqları aradan qaldırmalıdır".