...

Azərbaycan və Türkmənistan XİN-ləri arasında 2019-2020-ci illər üçün əməkdaşlıq proqramı imzalanıb (FOTO)

Siyasət Materials 18 Oktyabr 2018 16:10 (UTC +04:00)
Bakıda Azərbaycan və Türkmənistan XİN-ləri arasında siyasi məsləhətləşmələr baş tutub.
Azərbaycan və Türkmənistan XİN-ləri arasında 2019-2020-ci illər üçün əməkdaşlıq proqramı imzalanıb (FOTO)

Bakı. Trend:

Bakıda Azərbaycan və Türkmənistan XİN-ləri arasında siyasi məsləhətləşmələr baş tutub.

Azərbaycan Xarici İşlər Nazirliyindən Trend-ə verilən məlumata görə, nümayəndə heyətlərinə Azərbaycan tərəfindən xarici işlər naziri Elmar Məmmədyarov, Türkmənistan tərəfindən isə Nazirlər Kabineti sədrinin müavini, xarici işlər naziri Rəşid Meredov rəhbərlik ediblər.

Həmsöhbətlər iki qonşu ölkə arasında ənənəvi əməkdaşlığın əhəmiyyətini vurğulayaraq, Azərbaycan-Türmənistan münasibətlərinin inkişafı prioritetlərinin Dövlət başçıları tərəfindən müəyyən edildiyini vurğulayıblar.

Bu xüsusda, R.Meredov ölkəmizə etdiyi səfər zamanı Azərbaycan Prezidenti İlham Əliyev tərəfindən qəbul edildiyini minnətdarlıq hissi ilə vurğulayıb.

E.Məmmədyarov məsləhətləşmələrin keçirilməsini təqdirəlayiq hal kimi dəyərləndirərək, onların ikitərəfli münasibətlərin geniş gündəliyi üzrə müxtəlif məsələlər ətrafında müvqelərin əlaqələndirilməsi üçün gözəl imkan yaratdığını qeyd edib. Məsləhətləşmələr çərçivəsində tərəflər siyasi-diplomatik, o cümlədən ən yüksək səviyyədə səfərlər mübadiləsinin davam etdirilməsi, beynəlxalq və regional əməkdaşlıq barədə ətraflı müzakirəələr aparılıb. Aktau zirvə toplantısında imzalanmış Xəzər dənizinin hüquqi statusu üzrə konvensiyanın tarixi əhəmiyyəti bir daha önə çəkib.

İki ölkə arasında ticari-iqtisadi əməkdaşlıqda müşahidə edilən müsbət dinamika qeyd edilərək, onun keyfiyyət baxımından yeni, daha yüksək səviyyəyə qaldırılması məqsədilə, ayrı-ayrı dövlət qurumları və işgüzar dairələri tərəfindən yerinə yetirilməli işlərin əlaqələndirilməsi perspektivləri müzakirə edilib. Logistika, sənaye və mədəni-humanitar sahələrdə münasibətlərin daha da inkişaf etdirilməsi üçün əlverişli əməkdaşlıq fürsətlərinin olduğu vurğulanıb.

Görüş əsnasında R.Meredov beynəlxalq təşkilatlarda, ilk növbədə BMT sisteminə daxil olan qurumlarda Türkmənistanın təşəbbüslərinin nəinki sadəcə dəstəklənməsi, bir çox hallarda onlara həmmüəlif olaraq qoşulmasına görə Azərbaycan tərəfinə dərin təşəkkür bildirib.

Nazir E.Məmmədyarov öz tərəfindən beynəlxalq təşkilatlarda müxtəlif məsələlər üzrə, ən başlıcası isə Ermənistan-Azərbaycan münaqişəsi kontekstində ölkəmizin ərazi bütövlüyü və suverenliyinə göstərdiyi dəstəyə görə Türkmənistan tərəfinə minnətdarlıq ifadə edib.

Görüşdə, həmçinin beynəlxalq təşkilatlar çərçivəsində qarşılıqlı dəstəyin göstərməsi, ölkələr arasında müqavilə-hüquq bazasının genişləndirilməsinə dair fikir mübadiləsi aparıldı, o cümlədən qarşılıqlı maraq kəsb edən digər regional və beynəlxalq məsələlər müzakirə edilib.

Məsləhətləşmələrin yekunlarına dair nazirlər səviyyəsində Azərbaycan və Türkmənistanın XİN-ləri arasında 2019-2020-ci illər üçün əməkdaşlıq proqramı imzalanıb.

Məqalədə:
Xəbər lenti

Xəbər lenti