"Avropa Şurası Parlament Assambleyasının (AŞPA) payız sessiyasında Azərbaycanla bağlı məsələ gündəlikdə olmasa da biz bunu gündəmə gətirəcəyik". Trend xəbər verir ki, bu barədə AŞPA-da Azərbaycan nümayəndə heyətinin üzvü, millət vəkili Bəxtiyar Əliyev bildirib.
Millət vəkili qeyd edib ki, assambleyanın Dağlıq Qarabağ münaqişəsi ilə bağlı yaradılan alt komitənin iclasında 2005-ci ilin yanvarında Ermənistan hərbi birləşmələrinin Azərbaycan ərazisindən çıxarılması, Azərbaycan ərzisinin bütövlüyünün tanınması, qaçqın və köçkünlərin məskənlərinə qaytarılması ilə bağlı qəbul edilən siyasi qərarın hüquqi mexanizminin işlənib hazırlanması məsələsini də gündəmə gətirəcəklər.
B.Əliyev onu da qeyd edib ki, 2002-ci ildə qəbul edilən qətnaməyə əasən Cənubi Qafqazda qaçqın və kökünlərin vəziyyəti ilə bağlı yeni məruzə hazırlanır: "Həmin sənəddə qeyd edilib ki, Ermənistan işğal olunmuş bölgələrdə heç bir əsasla heç kimi yerləşdirə bilməz. Amma fakt odur ki, Ermənistan dövləti başqa yerlərdən bu ərazilərdə erməniləri yerləşdirir. Biz bu prosesin qarşısını almaqdan ötrü alt komitənin iclasında iş aparacağıq".
Millət vəkili AŞPA-nın iclasında "Azadlıq" blokunun sentyabrın 25-də keçirmək istədiyi mitinqlərlə bağlı baş verən məlum hadisələrə münasibət bildirilməyəcəyini də qeyd edib: "İrad bu iğtişaşlara cəhd göstərənlərin ünvanına olacaq. İrad Azərbaycan müxalifətinin siyasi mədəniyyətinin çox aşağı olmasına səslənəcək".
AŞPA-nın payız sessiyasının gündəliyində Azərbaycanla bağlı heç bir məsələnin olmadığını önə çəkən B.Əliyev qeyd edib ki, Dağlıq Qarabağ münaqişəsi üzrə yaradılan alt komitə Azərbaycan nümayəndə heyətinin təkidi ilə daim işləməlidir.
AŞPA-nın payız sessiyası öz işini oktyabrın 3-dən 8-dək davam etdirəcək. Azərbaycan nümayəndə heyəti oktyabrın 1-də Strasburqa yola düşəcək.