Azərbaycanın Los-Ancelesdəki konsulluğunun çağırışına əsasən, Azərbaycan-Amerika Mədəniyyət Cəmiyyəti Təşkilatının üzvləri Los-Anceles Dairəsinin etnik və mədəniyyət müxtəlifliyi bayramına həsr olunmuş paradda iştirak ediblər.
Konsulluqdan Trend ə verilən məlumata görə, parad Los-Ancelesdə yaşayan azərbaycanlı icmasını rəsmən tanıyan və azərbaycanlıların paradda iştirak etməsinə yardım göstərən Los-Anceles Dairəsinin protokol şöbəsi tərəfindən təşkil olunub.
Azərbaycanlı icmasının üzvləri milli libaslarımızı geyinərək, əllərində Azərbaycanın milli rəmzini tutublar. Soydaşlarımız Cənubi Kaliforniyanın rəngarəng mədəniyyəti fonunda ilk dəfə olaraq Azərbaycan mədəniyyətini təqdim ediblər.
"Azərbaycan Respublikasının Los-Ancelesdəki konsulluğu Los-Anceles Dairəsinin protokol şöbəsinə, Azərbaycan Respublikasının ABŞ-dakı Baş konsulluğuna, eləcə də konsulluğun xahişinə səs verərək bu tədbirə qoşulan Amerikada yaşayan bütün azərbaycanlılara minnətdarlığını bildirir", - deyə konsulluğun məlumatında qeyd olunur.