Azərbaycan Liberal Partiyasının lideri, "Azadlıq" blokunun həmsədri Lalə Şövkət müxalifətin etiraz aksiyası kimi müəyyən bir müddətə fəaliyyətini dayandırmağı təklif edir. Bu barədə Trend ə müxalifətçilərin Koordinasiya Şurasında təmsil olunan Ümid Partiyasının sədri İqbal Ağazadə məlumat verib.
O qeyd edib ki, Söz və mətbuat azadlığının müdafiəsi üzrə Koordinasiya Şurasının son toplantısında Lalə Şövkətin təklifi müzakirə olunub: "Lalə xanım təklif edir ki, müxalifət müəyyən müddətə fəaliyyətini dayandırsın, yerli və beynəlxalq ictimaiyyətə bu barədə, həmçinin ölkədəki durumla bağlı obyektiv şəkildə informasiyalar çatdırılsın, həmçinin müxalifətin yeni birliyi yaransın. Yeni birlik müxalifətin birgə aksiyalarını təşkil etsin, tədbirlər planı hazırlasın. Ümid Partiyasının bu təkliflərlə bağlı mövqeyini bildirdim. Lakin müzakirələrdə konsensus əldə olunmadı. Konsensusa gəlinmədiyindən də heç bir konkret qərar qəbul edilmədi".
Konsensusun olmamasının səbəblərinə toxunan İ.Ağazadə qeyd edib ki, hər partiya öz mövqeyində israrlı qalır. Ona görə də konkret razılığa gəlinməyib.
Müsavat Partiyasının başqanı İsa Qəmbər isə bildirib ki, azad medianın problemləri hələ də həll olunmamış qalır. Buna görə də müxalifət rəhbərləri söz və mətbuat azadlığının müdafiəsi məqsədilə Koordinasiya Şurasında fəaliyyətin davam etdiriməsini qərara alıblar: "ANS-in fəaliyyəti bərpa olunmur, "Azadlıq", "Milli yol" qəzetləri, "Turan" agentliyi binadan çıxarıldıqları üçün fəaliyyətləri çox çətin şəraitdə davam etdirilir. Problemlər həllini tapmadığı üçün media azadlığı uğrunda müxalifətin mübarizəsi davam etdiriləcək".