Gəncə Müstəqil Jurnalistika Mərkəzində region jurnalistləri üçün "KİV-də QİÇS mövzusunun işıqlandırılması" ilə bağlı 3 günlük seminar-treninq işə başlayıb. Trendin Qərb Bürosu seminarın aparıcısı, jurnalist-ekspert Zeynal Məmmədliyə istinadən bildirib ki, Bakıda redaktorlar və yazarlar üçün təşkil olunmuş seminar Gəncədən sonra Masallı və Qubada da davam etdiriləcək.
Zeynal Məmmədli və Fərəh Sabirqızı region jurnalistlərinin QİÇS-lə bağlı yazıların hazırlanmasında peşəkarlıqlarını artırmaq, onları bu sahədə olan son terminlərlər və standartlarla tanış etmək məqsədilə 3 gün müxtəlif mövzularda söhbətlər edəcəklər.
"QİÇS bu gün bütün dünyada, o cümlədəndə Azərbaycanda artıq aktual mövzudur. Lakin jurnalistlər bu mövzularda materiallar hazırlayarkən çox diqqətli və ehtiyatlı olmalıdırlar. Çünki həmin yazılar və süjetlər maarifləndirmə xarakterli olmaları ilə yanaşı insanları təşvişə salmamalıdır. Biz regionda fəaliyyət göstərən jurnalistlərə bu və digər vacib məsələlər barədə danışacağıq" - Fərəh Sabirqızı belə deyib.
