Azərbaycan prezidentinin Almaniya Nazirlər Kabineti qarşısında qarşılanma mərasimi keçirilib. Bu barədə Trend AzTV-yə istinadən xəbər verir.
Azərbaycan prezidentini Almaniya kansleri Anqela Merkel qarşılayıb. Bu dəqiqələrdə dövlət başçısının kanslerlə təkbətək görüşü başlayacaq.
Bu gün dövlət başçısı xarici işlər federal naziri Frank-Valter Ştaynmayerlə görüşəcək.
İlham Əliyev "dəyirmi masa" çərçivəsində aparıcı alman şirkətləri rəhbərləri ilə də görüşəcək. Səfər çərçivəsində Azərbaycan prezidenti fevralın 15-də Konrad Adenaur Fondunda "Azərbaycan XXI əsrdə: inkişaf və perspektivlər" mövzusunda sıxış edəcək. Azərbaycan səfirliyinin dəstəyi ilə təşkil olunmuş tədbirdə Almaniyanın müxtəlif siyasi və işgüzar dairələri nümayəndələrinin, Bundestaq üzvlərinin, hökumət və ictimaiyyət nümayəndələrinin iştirakı gözlənilir.
Bundan başqa, səfər proqramında hər iki ölkənin biznes-dairələri nümayəndələrinin iştirakı ilə biznes-forumun keçirilməsi də nəzərdə tutulub. Biznes-forum prezident İlham Əliyev və Almaniya iqtisadiyyat və texnologiyalar federal naziri Mixael Qlossun iştirakı ilə keçəcək.