Azərbaycan, Bakı, 31 yanvar / Trend , müxbir K.Zərbalıyeva/ "Azal"ın Təhlükəsizlik Xidmətinin sabiq rəisinin və onunla birgə həbs olunmuş dörd nəfərin məhkəmə prosesi qapalı keçiriləcək.
Ağır Hərbi Cinayətlərə Dair İşlər üzrə Məhkəmədə cümə axşamı keçirilən hazırlıq iclasında bu barədə qərar qəbul olunub.
"Azal"ın Təhlükəsizlik Xidmətinin sabiq rəisi Emil Süleymanov, aeroportun elektronika üzrə mütəxəssisi, mühəndisi Tahir Əsədzadə, "Azal"ın mühəndis-proqramçısı olmuş Faiq Quliyev, operativ xidmətə rəhbərlik etmiş Tamerlan Mikayılov və Milli Təhlükəsizlik Nazirliyinin polkovnik-leytenantı olmuş Rafət Əliyev Cinayət Məcəlləsinin silah, döyüş sursatı və partlayıcı maddələrin qanunsuz saxlanması, satışı və daşınması (228 ), əməliyyat-axtarış fəaliyyəti haqqında qanunvericiliyi pozma (302) və vəzifə səlahiyyətlərini aşma (308) maddələri ilə ittiham olunurlar.
Süleymanova həm də dövlətə xəyanət (274) maddəsi ilə ittiham irəli sürülüb.
Hakim Mürsəl Əliyevin sədrliyi ilə keçirilən iclasda Quliyev və Əsədzadənin vəkilləri müdafiə etdikləri şəxslərə qarşı irəli sürülən ittihamların əsassız olduğunu bildiriblər və cinayət təqibinə son qoyulması haqda vəsatət qaldırıblar.
Mikayılovun vəkili müdafiə etdiyi şəxs barəsində həbs-qətimkan tədbirinin dəyişdirilməsi, Süleymanovun vəkili Zaur İbadov isə 228, 308 və 302-ci maddələr üzrə ittihamların geri götürülməsi barədə vəsatətlə çıxış ediblər.
Hazırlıq iclasının qərarı ilə vəsatətlər təmin olunmayıb.
Dövlət ittihamçısı Toğrul Hüseynov prosesin qapalı keçirilməsini xahiş edib. Məhkəmə dövlət sirlərinin yayılmamsı məqsədilə prosesin qapalı keçirilməsinə qərar verib.
İş üzrə məhkəmə baxışı fevralın 14-də başlayacaq.