Azərbaycan, Bakı, 27 fevral / Trend , müxbir E.Hüseynli/ Azərbaycan Milli Təhlükəsizlik Nazirliyi və Dini Qurmlarla İş üzrə Dövlət Komitəsi fevralın 26-da Bakının Nərimanov rayonu ərazisində "Əbubəkir" məscidi ətrafında birgə əməliyyat keçirib. Dini Qurumlarla İş üzrə Dövlət Komitəsinin mətbuat xidmətinin rəhbəri Yaqut Əliyeva çərşənbə günü Trend -a bildirib ki, dini mağazalarda keçirilən yoxlamalar zamanı dözümsüzlük, digər dini cərəyanlara hörmətsizliyi yaydığına görə ümumilikdə 559 dini kitab müsadirə edilib.
Ötən il Komitə 750 adda kitabı ekspertizadan keçirib və 140 adda kitabın yayımına qadağa qoyub.
Komitədə ötən il dini kitabların ekspertizası üçün dinşünaslıq ekspertizası, ictimai məsələlər və analitik təhlil şöbəsi yaradılıb.
Əliyeva bildirib ki, reydlər zamanı "Əhli-Beyt" mağazasında 252, "İhlas" mağazasında 202, "Burxan" mağazasında 70 və "Gürabə" mağazasında 27 kitab müsadirə olunub. Onun sözlərinə görə, bu kitablar Dövlət Komitəsi tərəfindən yayımına qadağa qoyulan kitablardır. Müsadirə olunan kitabların hamısı islam yönümlüdür. Əliyeva deyib ki, müsadirə olunan kitabların bəziləri ölkəyə qeyri-qanuni yolla gətirilib, bəziləri isə Azərbaycanda çap olunub.
Faktla bağlı araşdırma aparılır.
