Azərbaycan, Bakı, 10 aprel / Trend , müxbir K.Zərbalıyeva/ Baş Prokurorluğun ibtidai istintaq orqanı olaraq istintaqla bağlı ictimaiyyətə məlumat vermək hüququ var. Bu sözləri cümə axşamı Trend a Baş Prokurorluğun mətbuat xidmətinin rəhbəri Vüqar Əliyev ATƏT-in söz azadlığı üzrə nümayəndəsi Mikolaş Haraştinin "Azadlıq" qəzetinin əməkdaşı Aqil Xəlilin bıçaqlanması ilə bağlı aparılan cinayət işinin materiallarının efirə verilməsinə etiraz olaraq söylədiyi fikirlərə münasibət bildirərkən deyib.
Haraşti cərşənbə günü keçirdiyi mətbuat konfransında bildirib ki, baş prokuror Zakir Qaralov onunla görüşdə Xəlillə bağlı materialın onun sifarişi ilə efirə verildiyini deyib.
ATƏT rəsmisi əslində Xəlillə bağlı efirə gedən məlumatın əsas məqsədinin jurnalistin bıçaqlanmasının üstünü örtmək, hadisəni unutdurmaqdan ibarət olduğunu deyib.
Haraşti hüquq-mühafizə orqanlarını tənqidçi jurnalistlərə qarşı bu cür saxtakarlıqları dayandırmağa çağırıb. O deyib ki, jurnalistlərə qarşı saxta cinayət işi açan hüquq-mühafizə orqanlarının özlərinə qarşı iş açılmalıdır.
Baş Prokurorluq rəsmisi bu materialların efirə verilməsinin sifariş kimi qiymətləndirilməsinin yanlış olduğunu deyib və qeyd edib ki, ola bilsin tərcümə zamanı baş prokurorun fikirləri yanlış tərcümə olunub.
Əliyevin sölərinə görə, həm cinayət-prosessual qanunvericilikdə, həm də Insan Haqları üzrə Avropa Məhkəməsinin presidentlərində istintaqla bağlı ictimaiyyəti məlumatlandırmaq barədə müddəalar yer alıb.
"Baş Prokurorluğun istintaqla bağlı indiki mərhələdə məlumat vermək fikri yox idi. Aqil Xəlil və "Azadlıq" qəzetinin direktoru Azər Əhmədin mətbuat konfransı keçirərək istintaqın obyektivliyini şübhə altına alması və istintaq sirrini yaymasından sonra məcburiyyət qarşısında qalıb qanunun yol verdiyi həddə istintaqla bağlı ictimaiyyətə məlumat verdik",-deyə Əliyev vurğulayıb.
O bildirib ki, istintaqın əvvəlindən Xəlilə və istintaqa hadisənin motivi məlum idi və bu motiv onu qane etmədiyinə görə, səs-küy salaraq orqanları istintaqı qərəzli aparmaqda ittiham etdi.
Respublika Prokurorluğunun yaydığı məlumatda qeyd olunur ki, Xəlil martın 13-də qeyri-ənənəvi cinsi oriyentasiyaya malik olan şəxslər tərəfindən bıçaqlanıb.
Xəlilin vəkili istintaqı aparan müstəntiqi qanun pozuntularına yol verdiyi üçün məhkəməyə verib.
Məqalənin müəllifi ilə [email protected] ünvanı ilə əlaqə saxlaya bilərsiniz
