Ukrayna, Kiyev, 27 may/ Trend , müxbir N.Novosvitski/ Azərbaycanda həbs olunan üç jurnalistin məsələsi və prezident seçkiləri ərəfəsində Seçki Məcəlləsinə dəyişikliklərin edilməsi AŞPA Monitorinq Komitəsinin çərşənbə axşamı Kiyevdə keçirilən iclasında AŞPA həmməruzəçiləri Andreas Herkel və Yevgeniya Jivkovanın məruzəsində toxunulan əsas mövzular olub.
"Əgər üç aparıcı jurnalist həbs edilibsə, əgər Seçki Məcəlləsinə seçki prosesində müvazinətə zəmanət verəcək düzəlişlər hələ qəbul edilməyibsə, o zaman vəziyyət, əlbəttə ki yaxşı deyil", - Herkel Trend -a bildirib.
Azərbaycanda üç jurnalist həbsdədir - "Azadlıq" qəzetinin baş redaktoru Qənimət Zahid, onun qardaşı, qəzetin əməkdaşı Mirzə Sakit və "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev.
Azərbaycanda prezident seçkiləri oktyabrın 15-də keçiriləcək. Azərbaycan hökuməti və Avropa Şurası Venesiya Komissiyası arasında birgə müzakirələrdən sonra Mülki Məcəlləyə əlavələr və dəyişikliklər edilib.
Hazırda Mülki Məcəlləyə əlavə və dəyişikliklər Hüquq siyasəti və dövlət quruculuğu üzrə parlament komissiyası tərəfindən qəbul edilib və mayın sonunadək Milli Məclisin müzakirəsinə çıxarılacaq.
Seçki Məcələsinə əlavə və dəyişikliklər layihəsində - seçki komissiyalarının formalaşdırılması üzrə yeni təkliflərin olmaması, imzaların toplanması və təbliğat üzrə kampaniyanın müddətinin azaldılması, namizədin qeydiyyat depozitinin 33 min manatdan 300 min manatadək artırılması, namizədin qeydiyyatının ləğvinin sadələşdirilməsi və dövlət televiziyası ilə təbliğata qadağanın qoyulması öz əksini tapıb.
Herkel qeyd edib ki, Məcəlləyə düzəlişlər Venesiya Komissiyası ilə birgə hazırlanmış dəyişikliklər çərçivəsində olmalıdır.
"Çox mübahisəli olacaq və müxalifətin razılaşmayacağı yeni məsələlərin qaldırılması etibar atmosferinə mənfi təsir etmək deməkdir", - Herkel söyləyib.
Onun rəyinə görə, bu müzakirələri prezident seçkilərindən sonrakı dövrə saxlamaq düzgün olardı. "Hazırda elə vəziyyət yaranıb ki, artıq Mülki Məcəlləyə dəyişikliklərə dair ilkin fikrin necə olduğunu xatırlamırlar", - həmməruzəçi qeyd edib.
Monitorinq Komitəsinin çərşənbə axşamı təsdiq etdiyi məruzəyə ilin sonunda, iyunda AŞPA-nın yay sessiyasında baxılacaq.
İyunda, AŞPA-nın yay sessiyasında müzakirəsi gözlənilən Azərbaycanda "siyasi məhbuslar" məsələsinə toxunan Herkel bu məsələnin mübahisəli olduğunu bildirib. "Etiraf etməliyəm ki, mən bu məsələyə çox vaxt ayırıram. Digər məsələlərlə də məşğul olmaq istəyirəm", - həmməruzəçi qeyd edib.
Onun sözlərinə görə, jurnalistləri həbs etmək siyasi məhbuslar probleminin bir hissəsidir. "Problemin bizim gördüyümüz digər hissəsi xəstə insanlardır. Onların siyasi məhbus olub-olmaması barədə mübahisə etmək olar", - o bildirib.
Herkelin rəyinə görə, dövlət çevrilişində ittiham olunan Rasim Əkbərov kimi məhbuslarla bağlı hallara, humanist yanaşmaq lazımdır. "Ruslan Bəşirli ilə bağlı vəziyyət kimi digər çox mübahisəli məsələlər də var".
Ruslan Bəşirli müxalifətin gənclər təşkilatının rəhbəri olub və dövlət çevrilişi və hakimiyyətin qəsb edilməsi cəhdinə görə həbs edilib.
Həmməruzəçi əlavə edib ki, hakmiyyətin, parlamentin və Azərbaycanın hüquq müdafiəçilərinin nümayəndələrinin tərkibinə daxil olduğu insan hüquqları üzrə işçi qrupunun fəaliyyətinə böyük ümid var.
Azərbaycanın hüquq müdafiəçiləri 30 nəfərdən ibarət siyasi məhbus siyahısını hazırlayıblar. Avropa Şurası bu siyahını tanıyıb.
Azərbaycanın AŞPA-dakı nümayəndə heyəti həmməruzəçiləri səlahiyyətlərini aşmaqda ittiham edir. "Herkelin AŞPA-nın adından danışmaq səlahiyyəti yoxdur", - Azərbaycanın AŞPA-da nümayəndə heyətinin üzvü, Azərbaycanın hakim partiyasının Siyasi Şurasının üzvü Aydın Mirzəzadə bir müddət əvvəl Trend -a bildirib.
Onun sözlərinə görə, Herkel siyasi partiyanın üzvü kimi çıxış edir. " Azərbaycan nümayəndə heyəti AŞPA-nın yaz sessiyasında Herkelin səlahiyyətlərini aşması haqqında məsələ qaldıracaq", - Mirzəzadə qeyd edib.
Müəlliflə əlaqə saxlamaq üçün elektron ünvan [email protected]
