Azərbaycan, Bakı, 16 iyun / Trend , müxbir K. Zərbalıyeva /
Milli Televiziya və Radio Şurası (MTRŞ) "Sumqayıt Gənclərinin Hüquqi Maarifləndirilməsi" İctimai Birliyinin bu quruma qarşı qaldırdığı iddia üzrə icraata xitam verilməsi üçün məhkəməyə müraciət edib.
MTRŞ-dan çərşənbə axşamı Trend -a verilən məlumata görə, qurumun prosesdə iştirak edən nümayəndəsi bu vəsatətlə məhkəməyə müraciət edib.
1 saylı Bakı İqtisad Məhkəməsində keçirilən prosesdə vəsatət müzakirə edilib və proses vəsatətin öyrənilməsi üçün iyunun 24-dək təxirə salınıb.
Birlik tərəfindən bu ilin yanvar ayında Sumqayıt şəhərində yerli telekanalın açılması üçün lisenziya verilməsi ilə bağlı MTRŞ-ya müraciət olunub.
Birlik Nuşirəvan Məhərrəmlini regional telekanalların inkişafına bürokratik əngəl yaratmaqda ittiham edir.
Birlik hesab edir ki, Sumqayıt şəhərində fəaliyyət göstərən bir telekanal yarım milyona yaxın əhalisi olan bir şəhər üçün xeyli aşağı göstəricidir. Ona görə də "Sumqayıt Gənclərinin Hüquqi Maarifləndirilməsi" İctimai Birliyi Sumqayıt şəhərində yeni bir telekanalın açılması təşəbbüsü ilə çıxış edib və 5 min nəfərdən bu məqsədlə imza toplayıb.
MTRŞ isə cavab olaraq bildirib ki, hazırda Sumqayıtda yeni telekanalın açılmasına ehtiyac yoxdur.
MTRŞ-nın hüquq şöbəsinin müdiri Nemət Cavadov Trend -a bildirib ki, hər hansı regionda telekanalın açılması müsabiqə yolu ilə mümkündür.
Cavadovun sözlərinə görə, Radio Tezliklər üzrə Dövlət Komissiyası tezliklərin siyahısını MTRŞ-yə təqdim edir.
"MTRŞ zəruri hesab etdiyi ərazidə həmin tezlik üzrə müsabiqə elan edir", - şöbə müdiri bildirib.
MTRŞ rəsmisi bildirib ki, Sumqayıtla bağlı MTRŞ-yə tezlik təqdim olunmayıb.
"Olunarsa belə, buna zərurət olduğu halda müsabiqə keçirilər. Hazırda Sumqayıtda bir telekanal fəaliyyət göstərir, lakin elə regionlar var ki, orda ümumiyyətlə yerli telekanal yoxdur. MTRŞ bu məsələdə balanslaşdırılmış siyasət həyata keçirir", - Cavadov vurğulayıb.
Məqalə müəllifi ilə əlaqə ünvanı: [email protected]