Azərbaycan, Bakı,10 avqust / Trend , müxbir H.Bağırov /
"Fransa-Azərbaycan" Səhmdar Cəmiyyətinin rəhbərinə hökm oxunub.
Trend -un məlumatına görə, bazar ertəsi Ağır Cinayətlərə Dair İşlər üzrə Məhkəmədə Cinayət Məcəlləsinin külli miqdarda mənimsəmə və ya israf etmə (179.3.2) maddəsi ilə ittiham olunan, 46 yaşlı Bakı şəhər sakini Şahin Musa oğlu Musayev məhkəmənin hökmü ilə 9 il azadlıqdan məhrum edilib.
Musayev 11 il axtarışda olub. Fransanın məşhur "Peugeot" şirkətinin Bakıdakı nümayəndəliyinə və "Fransa-Azərbaycan" SC-yə rəhbərlik etmiş Musayev 11 il əvvəl Azərbaycan Beynəlxalq Bankından götürdüyü 200 min ABŞ dolları məbləğində vəsaiti mənimsəməkdə təqsirli bilinir. Həmin vaxt Cinayət Məcəlləsinin 88-ci (mənimsəmə) maddəsi ilə barəsində axtarış elan olunmuşdu.
Musayev uzun müddət Fransada gizlənib.
O, Nərimanov Rayon Polis İdarəsinin 16-cı polis bölməsi əməkdaşlarının keçirdiyi əməliyyat-axtarış tədbirləri nəticəsində 2008-ci ilin oktyabrın 28-də Bakı şəhərindəki evində həbs edilib.
Məqalə müəllifi ilə əlaqə ünvanı: [email protected]
