Azərbaycan, Bakı, 19 avqust / Trend , müxbir H.Bağırov /
Azərbaycanda azyaşlı qızların ölümündə günahlandırılan qardaşların cinayət işi üzrə məhkəmə hökmündən verilmiş apellyasiya şikayətinə baxılıb.
Trend -un məlumatına görə, çərşənbə günü Sumqayıt Apellyasiya Məhkəməsində Dəvəçi rayonu Dağbilici kəndinin sakinləri Təvəkkül İsmayılov, Elnur İsmayılov və Elçin İsmayılovun işi üzrə məhkəmənin ilkin baxış iclası keçirilib.
Prosesdə zərərçəkmiş Zamir Məcidov və onun nümayəndəsi apellyasiya instansiyasında məhkəmə istintaqının aparılması barədə vəsatət qaldırıb.
Məhkəmə zərərçəkmişin vəsatətini qismən təmin edib.
Apellyasiya instansiyasında təqsirləndirilən şəxslər, zərərçəkmişlər və şahidlərin bir hissəsinin dindirilməsi qərara alınıb. Məhkəmə baxışı avqustun 31-də davam etdiriləcək.
Ağır Cinayətlərə Dair İşlər üzrə Məhkəmədə keçirilən prosesdə Təvəkkül İsmayılova ömürlük azadlıqdan məhrumetmə, Elnur İsmayılova 6 və Elçin İsmayılova 4 il müddətinə azadlıqdan məhrumetmə cəzası verilib.
Məhkəmə Elnur İsmayılov və Elçin İsmayılovun ittiham olunduqları 144 və 149-cu maddələrlə cinayət işinə xitam verib.
Dəvəçi rayonunun Dağbilici kənd sakinləri Nailə və Reyhanə Məcidova bacılarını qətlə yetirməkdə ittiham olunan İsmayılov qardaşlarına Cinayət Məcəlləsinin 120.1-ci (qəsdən adam öldürmə), 149-cu (zorlama), 150.2.3-cü (azyaşlı şəxsə qarşı seksual xarakterli əməllər törətmə), 127.1-ci (qəsdən sağlamlığa az ağır zərər vurma), 144.3-cü (adam oğurluğu), 177-ci (oğurluq), 178-ci (dələduzluq) və 221-ci (xuliqanlıq) maddələri ilə cinayət işi açılmışdı.
İsmayılov qardaşları ötən ilin avqustunda Reyhanə və Nailə Məcidova bacılarını öldürdükdən sonra meyitləri Samur-Abşeron kanalına atıblar.
Nailə Məcidovanın meyiti 2007-ci il avqustun 9-da Samur-Abşeron kanalının Siyəzən istiqamətində aşkarlanıb. Reyhanə Məcidovanın meyiti isə indiyədək tapılmayıb.
Ağır Cinayətlərə Dair İşlər üzrə Məhkəmənin hökmündən prokurorluq protest, zərərçəkmişlər isə şikayət veriblər. Prokurorluq Elnur və Elçin İsmayılov qardaşlarının cəzasının ağırlaşdırılmasını, zərərçəkmişlər isə işin ibtidai istintaqa qaytarılmasını tələb ediblər. Təvəkkül İsmayılov isə cəzasının müddətili cəza ilə əvəz edilməsini xahiş edib.
Məqalə müəllifi ilə əlaqə ünvanı: [email protected]
