Azərbaycan, Bakı, 30 oktyabr / Trend , müxbir H.Bağırov/
Azərbaycan Silahlı Qüvvələrinin dövlətə xəyanətdə ittiham olunan bir qrup hərbi qulluqçusunun apellyasiya şikayətinə baxılıb.
Trend -un məlumatına görə, cümə günü Şirvan Apellyasiya Məhkəməsində Azərbaycan Ordusunun əsgərləri Elçin Məmmədov, Orxan İsmayılov, Şamo Daşdəmirov və Mürşüd Bağırovun cinayət işi ilə bağlı Ağır Cinayətlərə Dair İşlər üzrə Hərbi Məhkəmənin çıxardığı hökmdən verilmiş apellyasiya şikayəti üzrə iclas keçirilib.
Təqsirləndirilən şəxslərin vəkilləri birinci instansiya məhkəməsinin qeyri-obyektiv məhkəmə istintaqı apardığını əsas gətirərək apellyasiya şikayətinə məhkəmə istintaqının keçirilməsi barədə vəsatət qaldırıblar.
Məhkəmə vəsatəti təmin etməyib və məhkəmə istintaqı aparılmadan şikayətə baxılması üzrə qərar çıxarıb.
Müdafiə tərəfi məhkəmənin bu qərarından Ali Məhkəməyə şikayət verəcəklərini bildiriblər. Bu səbəbdən də apellyasiya şikayətinə baxış dayandırılıb və cinayət işinin materilları Ali Məhkəməyə göndərilib.
Müdafiə Nazirliyinin Füzuli rayonunda yerləşən "N" saylı hərbi hissəsinin əsgərləri Elçin Məmmədov, Orxan İsmayılov, Şamo Daşdəmirov və Mürşüd Bağırov döyüş postunu özbaşına tərk edərək düşmən tərəfinin hərbçiləri ilə görüşüblər. Bu görüşlər zamanı əsgərlər hərbi sirr barədə erməniləri məlumatlandırıblar.
Təqsirləndirilən şəxslər Cinayət Məcəlləsinin 274-cü (dövlətə xəyanət) və 338.1-ci (Azərbaycan Respublikasına qəfil hücumun vaxtında aşkara çıxarılması və dəf olunması üzrə, yaxud onun təhlükəsizliyinin təmin edilməsi üzrə döyüş növbəsi (döyüş xidməti) çəkmə qaydalarını pozma, bu əməllər dövlətin təhlükəsizlik mənafelərinə zərər vura bilərdisə) maddələri ilə ittiham olunublar.
Məhkəmənin hökmü ilə Mürşüd Bağırov 14 il, Şamo Daşdəmirov 10 il 6 ay, Elçin Məmmədov 12 il, Orxan İsmayılov 13 il müddətinə azadlıqdan məhrum ediliblər.
Məqalə müəllifi ilə əlaqə ünvanı: [email protected]
