Azərbaycan, Bakı, 27 oktyabr /Trend, müxbir T.Hacıyev/
Azərbaycanda "Diffamasiya haqqında" qanun layihəsi parlamentin yaz sessiyasında müzakirəyə çıxarıla bilər. Bu barədə çərşənbə günü Trend-ə Azərbaycan Mətbuat Şurasının (MŞ) sədri Əflatun Amaşov məlumat verib.
"Diffamasiya haqqında" qanun layihəsi üzərində işi yəqin ki, yaza qədər qurtaracağıq və parlamentə təqdim edəcəyik", - Amaşov əlavə edib.
"Diffamasiya haqqında" qanun layihəsi 2005-ci ildə ATƏT-in Bakı ofisinin dəstəyi ilə hazırlanıb. Onu hazırlayan işçi qrupuna deputatlar, jurnalist təşkilatlarının nümayəndələri və hüquqşünaslar daxildir.
Beynəlxalq təşkilatlar hesab edirlər ki, təhqirə və böhtana görə cinayət məsuliyyətini nəzərdə tutan 147-ci (böhtan) və 148-ci (təhqir) maddələri Cinayət Məcəlləsindən çıxarılmalıdır.
"Diffamasiya haqqında" qanun layihəsinin qəbulu ilə bağlı 2009-cu ilin mayında 6 jurnalist təşkilatı - Azərbaycan Jurnalistlər Birliyi, Nəcəf Nəcəfov Fondu, Jurnalistika və İnkişaf Mərkəzi, "Yeni Nəsil" Jurnalistlər Birliyi, Azərbaycan Media Mərkəzi və Demokratik Jurnalistlər Liqası parlamentə müraciət etmişdi. Sonradan həmin müraciətə 400-ə yaxın KİV nümayəndəsi, jurnalist təşkilatlarının üzvləri də qoşulub. Qanun layihəsi ATƏT-in ekspertizasından keçirilib.
Amaşovun sözlərinə görə, "Diffamasiya haqqında" qanunla bağlı ictimai müzakirələr davam etdirilir.
"Hazırda bütün diqqət parlament seçkilərinə yönəlib. Seçkilərdən sonra, bu ilin sonlarında ictimai müzakirələri bərpa edəcəyik. İstərdik ki, qanun tezliklə qəbul olunsun. Ancaq qanunun yenidən işlənməsi, parlamentdə müzakirəsi, müzakirənin təşkili və baxılması yəqin ki, vaxt aparacaq", - o bildirib.
Amaşov deyib ki, Şura indiyə qədər qanun layihəsinin qəbulu üçün cəmiyyət nümayəndələri, jurnalistlərlə görüşlər keçirib.
"Bu məsələni ATƏT ilə birlikdə gündəmə gətirərkən iki şaxəli layihə üzərində işlədik. Bunlardan biri jurnalistlərin peşə davranışı qaydalarının təkmilləşdirilməsi idi. Artıq biz bunu etmişik. Digəri isə "Diffamasiya haqqında" qanun layihəsinin müzakirəsi, qəbulu və tətbiqi idi. Getdikcə cəmiyyət diffamasiya haqqında qanunla bağlı müəyyən məlumata malik olur", - Amaşov vurğulayıb.
