...

Azərbaycan Parlamentinin spikeri qiymət artımına münasibət bildirib

Cəmiyyət Materials 1 Fevral 2011 17:09 (UTC +04:00)
Azərbaycan Parlamentinin spikeri hesab edir ki, Tarif Şurasının qiymət artımı hiss olunacaq səviyyədə deyil.
Azərbaycan Parlamentinin spikeri qiymət artımına münasibət bildirib

Azərbaycan, Bakı, 1 fevral /Trend, müxbir M.Əliyev/

Azərbaycan Parlamentinin spikeri hesab edir ki, Tarif Şurasının qiymət artımı hiss olunacaq səviyyədə deyil.

"Tarif Şurasının qiymət artımı hiss olunacaq səviyyədə deyil. İçməli suyun qiyməti 12 qəpik artırılıb. Bu şirkət rentabelli işləyə bilmir, işçilər maaş ala bilmir", - Trend-in məlumatına görə, Milli Məclisin çərşənbə axşamı keçirilən iclasında spiker Oqtay Əsədov deyib.

Əsədov bildirib ki, dəmiryolu tarifləri isə qonşu Ermənistan və Gürcüstandandakı qiymətlərdən 3 dəfə ucuzdur.

Azərbaycanın Tarif Şurası ölkədə bəzi qiymətlərə dəyişiklik edib. Bu barədə Tarif Şurasından Trend-ə verilən məlumatda bildirilib.

Məlumatda qeyd edilib ki, yanvarın 31-də Azərbaycan Tarif (qiymət) Şurasının növbəti iclasında aidiyyəti dövlət qurumlarının müraciəti əsasında bir neçə sahə üzrə tariflərə baxılıb və müvafiq qərarlar qəbul edilib.

Qərara əsasən, Rabitə və İnformasiya Texnologiyaları Nazirliyinin tabeliyində olan "Azərpoçt" MMC (milli operator) tərəfindən göstərilən universal poçt xidmətlərinin tariflərinə baxılıb, daxili və beynəlxalq məktub korrespondensiyaları və bağlamalar üzrə xidmətin növündən asılı olaraq yeni tariflər müəyyənləşdirilib. Yeni tariflər daxili universal poçt xidmətləri üçün 20 qəpiklə 2 manat arasında dəyişir.

Beynəlxalq poçt göndərişlərində isə hər bir ölkə üzrə baza tarifləri və çəkiyə görə tariflər müəyyən edilib.

"Azərsu" Səhmdar Cəmiyyətinin müraciətinin Tarif (qiymət) Şurasında aparılan müzakirəsindən sonra 1 m3 suyun maya dəyərinin tariflərdən xeyli aşağı olması nəzərə alınaraq, tariflərə yenidən baxılıb, sudan istifadə xidmətlərinin tarifləri ƏDV daxil olmaqla əhaliyə Bakı, Sumqayıt, Gəncə, Mingəçevir, Şirvan, Xırdalan şəhərləri və Abşeron rayonu üzrə 1 m3 üçün 30 qəpik, digər regionlarda 25 qəpik, qeyri-əhali istehlakçı qrupları üçün ölkənin bütün ərazisi üzrə 1 manat, tullantı sularının axıdılması xidmətlərinin tarifləri əhali qrupu üzrə 6 qəpik, digər istifadəçilər üçün 30 qəpik səviyyəsində müəyyən edilib.

Sudan xammal kimi istifadə edən istehlakçılar üçün isə tariflər dəyişdirilməyib. Bununla yanaşı, əhali istehlakçı qrupunda sayğacsız abonentlər üzrə bir nəfər üçün aylıq istehlak norması 6 m3-dən 5 m3-ə endirilib.

Tarif (qiymət) Şurasının iclasında "Azərbaycan Dəmir Yolları" QSC-nin müraciəti əsasında ölkədaxili sərnişindaşıma xidmətlərinə də baxılıb, marşrutlar üzrə biletlərin qiymətləri vaqonun tipindən asılı olaraq müəyyənləşdirilib.

Yeni tariflər istiqamətlərdən və məsafədən asılı olaraq adi qatarlarda 3-19 manat, sürət firma qatarlarında 14-25 manat arasında dəyişir.

Tariflərə yataq dəstinin dəyəri də daxil edilib. Sadə elektrik qatarlarında gediş haqqı 20 qəpiklə 2 manat arasında, sürətli elektrik qatarlarında isə 60 qəpiklə 6 manat arasında müəyyən olunub.

Qərar qəbul edilərkən 1997-ci ildə təsdiq edilmiş mövcud ölkədaxili sərnişindaşıma tariflərinin bu xidmətlərə çəkilən xərclərdən dəfələrlə aşağı olması nəzərə alınıb.

Aparılan təhlillər göstərir ki, yeni tariflər qonşu dövlətlər və MDB ölkələrinin uyğun tarifləri ilə müqayisədə aşağı səviyyədə olacaq.

Xəbər lenti

Xəbər lenti