Bakı. Trend:
2025-ci ilin yanvar-avqust ayları arasında Avropa İttifaqının xarici sərhədlərini qanunsuz keçmə halları 112 375 dəfə qeydə alınıb ki, bu da əvvəlki ilin eyni dövrü ilə müqayisədə 21% azdır.
Trend xəbər verir ki, bu barədə Frontex-in ilkin məlumatlarında bildirilir.
Ən əhəmiyyətli azalmalar Qərbi Afrika və Qərbi Balkan marşrutlarında (müvafiq olaraq 52% və 47%), həmçinin şərq quru sərhədində (44%) müşahidə olunub.
Agentlik vurğulayır ki, Aralıq dənizi Aİ-yə qeyri-qanuni miqrasiya üçün əsas marşrut olaraq qalır. Şərqi Aralıq dənizində qeyri-qanuni keçidlər 18% azalsa da, Krit adasında miqrasiya təzyiqi artıb. Qərbi Aralıq dənizi marşrutunda isə səkkiz ay ərzində 22%, təkcə avqust ayında isə 60% artım qeydə alınıb.
Frontex-in məlumatları Aİ ölkələrinə qeyri-qanuni miqrasiyanın ümumi axınında azalma tendensiyasını təsdiqləyir.