Azərbaycan, Bakı, 9 may /Trend, müxbir K.Zərbalıyeva/
Heydər Əliyev Fondunun təşəbbüsü, ARDNŞ-nin dəstəyi ilə Mərkəzi Neftçilər Xəstəxanasının Ürək və Damar Xəstəlikləri Mərkəzinin 35 nəfərlik yüksək ixtisaslı kardiocərrahiyyə briqadası Naxçıvan şəhərində növbəti humanitar aksiyaya start veriblər. Bu barədə Trend-ə bazar ertəsi ARDNŞ Sosial İnkişaf İdarəsinin məbuat xidmətindən məlumat verilib.
Ümummilli lider Heydər Əliyevin anadan olmasının 88-ci ildönümü münasibətilə Naxçıvan Müalicə Diaqnostika Mərkəzində (MDM) təşkil olunan aksiya çərçivəsində mayın 3-dən 11-dək ürək xəstəliyindən əziyyət çəkən 20 Naxçıvan sakini üzərində açıq ürək əməliyyatları aparılması nəzərdə tutulub.
Mayın 9-dək artıq 15 xəstə üzərində uğurlu əməliyyat həyata keçirilib. Onların arasında anadangəlmə ürək qüsuru olan uşaqlar, o cümlədən 1 və 2 yaşlı körpələr də var.
Mərkəzi Neftçilər Xəstəxanasının kardiocərrahiyyə briqadası 2007-ci ildən başlayaraq 4 il ərzində 500-dən çox xəstə üzərində angeoqrafiya, angeoplastika, eləcə də 200-ə qədər insan üzərində cərrahiyə əməliyyatları həyata keçiriblər.
Aksiya çərçivəsində mayın 8-də Naxçıvan Muxtar Respublikasının Səhiyyə Nazirliyi, Naxçvan Dövlət Universiteti, ARDNŞ-nin Sosial İnkişaf İdarəsi və Azərbaycan Kardiovaskulyar Cərrahlar Assosiasiyasının təşkilatçılığı ilə ümummilli lider Heydər Əliyevin anadan olmasınn 88-ci ildönümünə həsr olunmuş "Ürək xəstəliklərinin müalicəsinin bu günü və gələcəyi" mövzusunda elmi konfrans keçirilib.
ARDNŞ Sosial İnkişaf İdarəsi Səhiyyə Departamentinin rəisi, tibb elmləri namizədi Fuad Əlizadə bildirib ki, 4 ildir Heydər Əliyev Fondunun təşəbbüsü, ARDNŞ-nin dəstəyi ilə mütəmadi şəkildə keçirilən aksiyaların məntiqi nəticəsi olaraq, bu dəfə Naxçıvanda 200-cü açıq ürək əməliyyatı tamamlanmış olacaq.
