Azərbaycan, Bakı, 13 aprel /Trend, müxbir İ.İzzət/
Bu gün Bakıda Azərbaycan Dövlət Teleqraf Agentliyinin (AzərTAc) binasında AzərTAc-ın və Rusiyanın İTAR-TASS agentliyinin birgə təşkilatçılığı ilə ümummilli lider Heydər Əliyevin anadan olmasının 90 illiyinə həsr olunmuş fotosərginın açılış mərasimi keçirilib.
Trend-in məlumatına görə, sərgidə çıxış edən AzərTAc-ın baş direktoru Aslan Aslanov deyib ki, bu sərginin təşkilinə İTAR-TASS-ın göstərdiyi dəstəyin böyük rəmzi mənası var, çünki ümummilli lider Heydər Əliyev öz titanik fəaliyyəti ilə həm Azərbaycanın, həm də Rusiyanın inkişafına, müstəqillik illərində isə ölkələrimiz və xalqlarımız arasında münasibətlərin yeni müstəvidə möhkəmlənməsinə əvəzsiz töhfələr verib.
Aslanov bildirib ki, Azərbaycanın tarixi taleyində müstəsna xidmətləri olan, Rusiya Prezidenti Vladimir Putinin siyasət nəhəngi adlandırdığı ulu öndər Heydər Əliyevin həyatının ən maraqlı və ən müxtəlif anlarını yenidən bizə xatırladan çox maraqlı fotoşəkillərdən ibarət sərgidəki qiymətli yadigarlar İTAR-TASS-ın və AzərTAc-ın fotoarxivlərindən götürülüb və dahi Heydər Əliyevin şərəfli ömür yolunun şanlı salnaməsinin kiçik bir hissəsidir.
"Bəşəriyyətin siyasi tarixi zaman baxımından istər yetərincə qısa müddətləri, istərsə də daha uzun intervalları əhatə edən müxtəlif liderlərin nümunələri ilə zəngindir. Lakin bütün dövrlər üçün və bütün xalqın lideri olmaq siyasətdə çox nadir hadisədir. Azərbaycan xalqının dahi oğlu Heydər Əliyev məhz bu cür fenomen şəxsiyyət və ucadan uca zirvədir. Bu ucalığın əzəməti zaman bizi böyük azərbaycanlının cismən əbədiyyətə qovuşmasından uzaqlaşdırdıqca daha aydın, daha möhtəşəm görünür", - Aslanov bildirib.
Onun sözlərinə görə, ümummilli lider Heydər Əliyevin şah əsəri olan müasir müstəqil Azərbaycan bu gün inkişafının yeni mərhələsini yaşayır.
"Azərbaycan bölgənin şəksiz lider dövlətidir. Bu gün bütün dünyada Azərbaycan ilə ilk növbədə ona görə maraqlanırlar ki, bu ölkə postsovet məkanında iqtisadi və siyasi novasiyaları ən fəal şəkildə tətbiq edən bir dövlətdir. Bütün bunlar Heydər Əliyevin - Şərq müdrikliyini və Qərb dinamizmini özündə təcəssüm etdirən, Azərbaycanı dünyaya tanıdan dahi bir insanın möhtəşəm xidmətlərinin bəhrəsidir", - AzərTAc-ın baş direktoru deyib.
İTAR-TASS-ın baş direktoru Sergey Mixaylov böyük insan Heydər Əliyevin anadan olmasının 90 illiyinə həsr olunmuş sərginin açılışında iştirak etməsindən məmnun olduğunu qeyd edib. "Böyük insanlar tarixdə böyük izlər qoyurlar. Burada, Bakıda heç bir yerdə olmadığı kimi hər gün, hər addım, hər baxış Heydər Əliyev tərəfindən bünövrəsi qoyulan fikirlərin və başlanğıcların burada indi onun oğlu tərəfindən necə istedadla həyata keçirildiyini hiss etdirir. Respublika göz önündə inkişaf edir, yaxşılaşır. Ecazkar ölkədir, ecazkar dostluğu ilə, ecazkar səxavətliliyi ilə, ecazkar istiqanlılığı ilə. Mən çox şadam ki, bizə - AzərTAc və İTAR-TASS informasiya agentliklərinə bizim Heydər Əliyevin 90 illiyinə həsr edilmiş fotoşəkillərimizdən bu gün bu sərgini təşkil etmək nəsib olub", - Mixaylov qeyd edib.
Mərasimdə çıxış edən İTAR-TASS-ın baş direktorunun müavini, əslən Azərbaycandan olan Mixail Qusman bir insan, vətəndaş və vətənpərvər kimi formalaşmasında Heydər Əliyevə minnətdar olduğunu bildirib.
"Azərbaycanın elə bir dövrü Heydər Əliyevin adı ilə bağlıdır ki, bu dövrdə mənim gəncliyim keçib. Biz məhz ona bənzəməyə çalışırdıq, onun dərsləri bizim üçün həyatda əsas idi. Bizi Heydər Əliyevin həyatdan getməsindən nə qədər çox zaman ayırırsa, onun necə böyük insan, vətəndaş, Azərbaycanın həqiqi vətənpərvəri olduğunu daha yaxşı anlamağa başlayırsan. Bu insan müasir Azərbaycanın əsasını qoyub. Mənim Vətənim - Azərbaycanın iqtisadiyyatda, mədəniyyətdə, sosial həyatda, bütün sahələrdə özünü göstərən və bu gün respublikada İlham Əliyev tərəfindən yüksək səviyyədə davam etdirilən uğurlarının hamısının əsası Heydər Əliyev tərəfindən qoyulub", - Qusman bildirib.
Sərginin açılış mərasimində Rusiyanın Azərbaycandakı səfiri Vladimir Doroxin də iştirak edib.
Qeyd edək ki, fotosərgidə AzərTAc və İTAR-TASS-ın arxivindən seçilmiş 70-dən çox foto nümayiş olunub.
Fotolarda əks olunmuş məqamlar ulu öndər Heydər Əliyevin bioqrafiyasının ötən əsrin 1960-cı illərinin sonundan Azərbaycanın rəhbəri, daha sonra SSRİ-nin rəhbərlərindən biri kimi fəaliyyəti və 1993-cü ildən 2003-cü ilədək müstəqil Azərbaycanın Prezindeti postunda ümumilikdə 35 illik bir dövrünü əhatə edir.