Bakı. Trend:
5 avqust tarixində BQXK nümayəndələri iyulun 29-da saxlanılan şəxsə bir daha baş çəkiblər.
BQXK-nın Azərbaycan nümayəndəliyinin ictimaiyyətlə əlaqələr şöbəsinin rəhbəri İlahə Hüseynova Trend-ə bildirib ki, saxlanılan şəxslə təkbətək görüş keçirilib və o Qızıl Xaç Məktubu vasitəsilə ailəsi ilə əlaqə saxlamaq imkanından istifadə edib.
“Mandatına uyğun olaraq BQXK, başçəkmələr zamanı saxlanılan şəxslərlə rəftarı və saxlanma şəraitini qiymətləndirir. BQXK həmçinin, şəxslərin ailələri ilə əlaqələrini bərpa etmək və ya davam etdirmək üçün şərait yaradır. BQXK-nın prosedurlarına uyğun olaraq, başçəkmələrlə bağlı müşahidələr və tövsiyələr yalnız saxlayan tərəflə paylaşılır”, - o qeyd edib.
Qeyd edək ki, Vaqif Xaçatryan erməni hərbi birləşmələrinin
tərkibində 1991-ci ilin 22 dekabr tarixində Xocalı rayonunun Meşəli
kəndində azərbaycanlılara qarşı kütləvi qırğın törədib.
Qırğın zamanı 25 azərbaycanlı öldürülüb, 14 nəfər yaralanıb, 358
nəfər azərbaycanlı isə didərgin salınıb. Qeyd edilən kütləvi qırğın
ilə əlaqədar aparılan cinayət işi üzrə Vaqif Çerkezoviç Xaçatryanın
Azərbaycan Respublikası Cinayət Məcəlləsinin 103 (Soyqırımı) və
107-ci (Əhalini deportasiya etmə və ya məcburi köçürmə) maddələrilə
təqsirləndirilən şəxs qismində məsuliyyətə cəlb olunması barədə
qərar qəbul edilib.
Ona məhkəmənin qərarı ilə həbs qətimkan tədbiri seçilib və o, məhz
bu cinayət işi çərçivəsində iyulun 29-da Beynəlxalq Qırmızı Xaç
Komitəsinin vasitəçiliyi ilə müalicə almaq adı altında Ermənistana
getmək istəyərkən Dövlət Sərhəd Xidmətinin hərbi qulluqçuları
tərəfindən Azərbaycan-Ermənistan dövlət sərhədinin “Laçın”
sərhəd-buraxılış məntəqəsində saxlanılıb.