2006-cı ilin dekabrından yanvar ayınadək cəmi 5 min nəfər Azərbaycan Respublikası vətəndaşı Moskvadan deportasiya edilib. Bu barədə Trend ə azərbaycanlıların qeydiyyat problemləri ilə bağlı Moskvada yaradılmış mərkəzi operativ qərargahın hüquqşünası Azər Əliyev məlumat verib.
O bildirib ki, Moskvada qərargah açılandan indiyədək 350 nəfərədək azərbaycanlı bura müraciət edib. A.Əliyevin sözlərinə görə, hüquqşünaslar soydaşlarımıza hüquqi yardımlar edir, qeydiyyat üçün hansı sənədlərin toplanması, hansı qurumlara təqdim edilməsi barədə izahatlar verirlər. Həmçinin imkan daxilində bəzi şəxslərə maddi köməklik də göstərilir. A.Əliyev qeyd edib ki, Bakıda bir sıra kütləvi informasiya vasitələri Moskvadan 50-70 min nəfər azərbaycanlının deportasiya edildiyini yazırlar. Onun sözlərinə görə, bu, yanlış məlumatdır: "Cəmisi il boyu Moskvadan təxminən 5 min nəfər azərbaycanlı deportasiya edilib. Ümumiyyətlə, deportasiya edilənləriin tam dəqiq sayını söyləmək çətindir. Lakin on minlərlə adamın deportasiya edilməsi həqiqətə uyğun deyil".
Hüquqşünas bildirib ki, bu il aprelin 15-dək Rusiyanın bazarlarında, ticarət mərkəzlərində təxminən 40 faizədək azərbaycanlılar qalıb işləyəcəklər. Aprelin 15-dən sonra bu rəqəm sıfıra endiriləcək: "Kimin qeydiyyatı və ticarət üçün icazəsi var, onlar aprelin 15-dək qalıb işləyəcəklər. Lakin aprelin 15-dən sonra bazarlarda xarici vətəndaş olan bir nəfər belə qalmayacaq. Həmçinin kimin 3 aylıq qeydiyyat müddəti qurtarıbsa o, mütləq Rusiya ərazisindən çıxmalı, yenidən gəlməlidir. Yenidən qayıtdıqdan sonra isə başqa peşə sahələrində çalışa bilərlər. Müvafiq icazəni aldıqdan sonra məsələn, çilingər, dülgər, xarrat və sair işləyə bilərlər. Ancaq bazarlarda satıcı ola bilməzlər".
Qeyd edək ki, Xarici Ölkələrdə Yaşayan Azərbaycanlılarla İş üzrə Dövlət Komitəsi Ümumrusiya Azərbaycanlıları Konqresi ilə birgə Rusiyanın paytaxtında və müxtəlif vilayətlərində miqrasiya problemləri ilə bağlı azərbaycanlılara hüquqi yardım məqsədilə qərargahlar yaradıblar.
