Azərbaycan, Bakı / Trend müxbir S.İlhamqızı/ Bakıda səfərdə olan BMT-nin fikir və ifadə azadlığı hüququnun qorunması və təşviqi üzrə xüsusi məruzəçisi Ambeyi Liqabo çərşənbə günü Azərbaycanın daxili işlər naziri general-polkovnik Ramil Usubovla görüşüb. Bu barədə Daxili İşlər Nazirliyindən məlumat verilib.
Nazir BMT nümayəndəsinə Azərbaycanda ictimai-siyasi proseslər, həyata keçirilən hüquqi-demokratik islahatlar, cinayətkarlıqla mübarizənin səviyyəsi barədə məlumat verib. Usubov qeyd edib ki, 2002-2006-cı illər ərzində vətəndaşlarla kobud rəftar, əsassız saxlama, məsuliyyətə cəlb etmə, qanunsuz axtarış aparma kimi hüquq pozuntularına görə DİN strukturlarının 522 əməkdaşı cəzalandırılb, onlardan 33 nəfəri cinayət məsuliyyətinə cəlb olunub, 85-i daxili işlər orqanlarından xaric edilib.
Nazir onu da deyib ki, 2001-2006-cı illərdə KİV-lərdə dərc edilən polis əməkdaşları ilə bağlı hüquq pozmalara dair 106 fakt üzrə Nazirliyin Daxili Təhqiqat İdarəsi tərəfindən araşdırma aparılıb, 18 fakt təsdiqini tapıb, günahkar əməkdaşlar cəzalandırılıb.