Azərbaycan, Bakı, 19 aprel /Trend/
2020-ci ildə Olimpiya Oyunları Bakıda keçirilməsə, Azərbaycan 2024, 2028 və belə gedişlə namizədliyini irəli sürməkdə davam edəcək. Trend-in məlumatına görə, bunu Rusiya KİV-ə müsahibəsində Milli Olimpiya Komitəsinin vitse-prezidenti Çingiz Hüseynzadə deyib.
"Hələ 2016-cı il Yay Olimpiya Oyunlarına sifariş ərizələrinin verilməsinə start veriləndə, Bakı namizədliyini irəli sürdü. Ona görə də təbii ki, biz Olimpiada-2020-yə də namizədliyimizi verdik. Ötən kampaniya dövründə Olimpiadanı Bakıda keçirmək istəyimiz böyük idi. Fikrimcə, 2020-ci ildə alınmasa, 2024, 2028 və belə gedişlə namizədliyimizi irəli sürməkdə davam edəcəyik. Yəni, Olimpiya Oyunlarını keçirmək hüququnu əldə edənədək mübarizəmizi davam etdirəcəyik" Hüseynzadə deyib.
Onun sözlərinə görə, Olimpiada-2020 Bakıda olsa, Eurovizion-2012 Mahnı Müsabiqəsinin keçiriləcəyi "Bakı Kristal Zalı" bir neçə Olimpiya idman növündə yarışları qəbul edəcək.