Bakı. Trend:
İtaliyanın futbol klubu "Yuventus" Çempionlar Liqası qrup mərhələsinin altıncı turunun səfər matçında İspaniyanın "Barselona" komandasını 3:0 hesabı ilə məğlub etdi.
Trend-in məlumatına görə, Kristiano Ronaldo dubla imza atdı (13, 52-ci dəqiqə), portuqaliyalı hücumçu hər iki qolu penaltıdan vurdu. Digər qolu Veston Makkeni (20) vurdu.
Qeyd edək ki, K.Ronaldo və "Barselona"nın hücumçusu Lionel Messi 6 May 2018-ci ildən bəri ilk dəfə üz-üzə oyun keçiriblər. Bundan əvvəlki oyun Ronaldonun o vaxt olduğu "Real Madrid" ilə "Barselona"nın 2:2 hesablı heç-heçə matçı ilə bitib.
Hər iki komanda bundan əvvəl Çempionlar Liqası 1/8 finalında iştirakını təmin etmişdi. "Yuventus" G qrupunda birinci, "Barselona" ikinci yeri tutub.