...

Zaqatalada "Kütləvi çıxarış" kampaniyasında 60 sakinə çıxarış təqdim olunub (FOTO)

İqtisadiyyat Materials 21 Aprel 2017 13:24 (UTC +04:00)
Zaqatala rayonunda Əmlak Məsələləri Dövlət Komitəsi tərəfindən növbəti “Kütləvi çıxarış” kampaniyası keçirilib.
Zaqatalada "Kütləvi çıxarış" kampaniyasında 60 sakinə çıxarış təqdim olunub (FOTO)

Trend-i buradan izləyin

Bakı. Trend:

Bu gün Zaqatala rayonunun mərkəzində və rayonun bir neçə kəndində Əmlak Məsələləri Dövlət Komitəsi tərəfindən növbəti “Kütləvi çıxarış” kampaniyası keçirilib.

Komitədən Trend-ə verilən məlumata görə, kampaniya nəticəsində 60-a yaxın rayon sakininə birbaşa yaşadıqları ərazilərdə əmlaklarına dair çıxarışlar təqdim olunub. Kampaniya çərçivəsində mobil ofislərə müraciət edən 50-dən çox sakindən isə öz əmlaklarına dair çıxarış almaq üçün ilkin hüquq müəyyənedici sənədlər qəbul edilib. Verilən çıxarışlar əsasən fərdi yaşayış evləri, pay torpağı, həyətyanı torpaq sahələrini əhatə edib.

Əmlak Məsələləri Dövlət Komitəsi “Kütləvi çıxarış” kampaniyasını kənd təsərrüfatı ilə məşğul olunan sahələrdə, birbaşa kəndlilərin işlədikləri tarlalarda, əkin biçin yerlərində də keçirir. Kampaniya vətəndaşların vaxtlarını daha səmərəli planlaşdırmağa, əmlaklarına sənəd almaq üçün əlavə ünvanlara getmədən qeydiyyat xidmətlərindən yararlanmağa şərait yaradıb. Sakinlər sənədləşdirmənin belə sürətli və rahat şəkildə olmasından, xidmətlərin onların ünvanına çatdırılmasından və göstərilən müxtəlif növ qeydiyyat xidmətlərindən razılıqlarını ifadə ediblər.

Kampaniya çərçivəsində daşınmaz əmlaklarına çıxarış almaq üçün müraciət edən, lakin ilkin sənədləri qaydasında olmayan və çatışmazlıqlar olan bir qrup kənd sakininə hüquqi yardım xidmətləri də göstərilib. Sənədlərin qanunvericiliyin tələblərinə uyğun olaraq qaydaya salınması və çatışmayan sənədlərin müvafiq icra hakimiyyəti orqanlarından alınması ilə bağlı hüquqi məsləhətlər verilib. Vətəndaşlar komitə əməkadaşları tərəfindən xidmət haqqı və dövlət rüsumunu əvvəlcədən öyrənməyə imkan verən “Daşınmaz əmlakın qeydiyyatı” kalkulyatoru barədə məlumatlandırılıblar. Məbləğin əvvəlcədən dəqiq bilinməsi isə sənədləşdirmə işi üçün zəruri xərcləri dəqiq planlaşdırmağı təmin edir, vətəndaş məmur münasibətlərini minumuma endirir.

“Kütləvi çıxarış” kampaniyası ilə yanaşı, respublikanın hər bir bölgəsində komitənin xüsusi nəqliyyat vasitələri ilə vətəndaşlara fərdi qaydada gündəlik olaraq mobil ofis xidmətləri də göstərilir. Bu kampaniyalar çərçivəsində vətəndaşlara fərdi qaydada çıxarışların təqdim olunması, ilkin sənədlərin qəbulu həyata keçirilir. Bu il ərzində mobil ofis vasitəsilə 20 minə yaxın vətəndaşa qeydiyyat və bir sıra xidmətlər göstərilib.

Komitə tərəfindən cari il ərzində 10 “Kütləvi çıxarış” kampaniyası keçirilib. Bunlardan 2-si paytaxtda 8- i isə regionlarda baş tutub. Bu ilin sonunadək paytaxt və regionlarda mobil ofis xidmətləri, həmçinin “Kütləvi çıxarış” kampaniyası davam etdiriləcək.

Məqalədə:
Xəbər lenti

Xəbər lenti