Bakı. Trend:
1997-ci ildən 2023-cü ilin sonuna kimi Milli Depozit Mərkəzində (MDM) mövcud olan depo hesabların sayı 121 610 təşkil etmişdisə, 2024-cü ilin sonunda bu rəqəm 160 545 olub.
Trend xəbər verir ki, bunu bu gün Milli Depozit Mərkəzinin İdarə Heyətinin sədri Ağahüseyn Xudaverdiyev Azərbaycan Maliyyə Forumunda çıxışı zamanı deyib.
O bildirib ki, aktiv depo hesabların sayı isə müvafiq olaraq 2023-cü ilin sonuna 75 024 təşkil edirdisə, 2024-cü ilin sonunda 105 552 olub:
"Eyni zamanda, təkrar bazarda ticarəti mümkün edən zəruri
infrastruktur istifadəyə verilmişdir.
Nəticədə MDM-in İnvestor portalında və APİ vasitəsilə investorlar
üçün balanslarında olan qiymətli kağızlar barədə məlumatların əldə
edilməsi imkanı yaradılmışdır".
"Rəqəmsallaşma sahəsində MDM tərəfindən həyata keçirilmiş digər mühüm yenilik isə səhmdarların ümumi yığıncaqlarının məsafədən keçirilməsi və elektron səsvermə sisteminin tətbiqidir. MDM bu xidməti ilk dəfə olaraq ölkəmizdə tətbiq edərək, əlçatanlıq səviyyəsinin artırılmasına, səhmdarların hüquqlarının qorunmasına və şəffaflığın artırılmasına tövhə vermişdir.
Hazırda bu sahədə emitentlərə və investorlara göstərilən xidmətlər üzrə elektron çıxarışların və online ödənişlərin tətbiqi üzrə işlər davam etdirilir", - deyə Ağahüseyn Xudaverdiyev qeyd edib.