Bakı. Trend:
Naxçıvan günəş elektrik stansiyasda bu ilin yanvar ayında 1.720 min kVt-saat elektrik enerjisi istehsal edilib.
Bu barədə Trend-in sorğusuna cavab olaraq Naxçıvan Dövlət Energetika Xidmətindən məlumat verilib.
Bildirilib ki, stansiyada il ərzində 33 milyon kVt-saat elektrik enerjisi istehsal edilməsi nəzərdə tutulub.
Xatırladaq ki, Naxçıvan günəş elektrik stansiyasında ötən il 32.793 min kVt-saat elektrik enerjisi istehsal edilib.
Qeyd edək ki, Babək rayonu ərazisində 20 meqavatt güclü Naxçıvan günəş elektrik stansiyasının tikintisi haqqında Naxçıvan Muxtar Respublikasının Dövlət Energetika Xidməti ilə Belçika Krallığının “Soltech” şirkəti arasında 7 fevral 2015-ci il tarixdə bağlanmış müqaviləyə əsasən tikinti-quraşdırma işləri həyata keçirilib. 2015-ci iln 30 noyabında istismara verilən 20 MVt gücündə günəş elektrik stansiyasının layihə gücü 2017-ci ilin sentyabr ayının 8-də daha 2 MVt artırılaraq, 22 MVt-a çatdırılıb.
Muxtar Respublikanın yerləşdiyi əlverişli coğrafi mövqe və iqlim şəraiti imkan verir ki, ekoloji cəhətdən təmiz və bərpa olunan alternativ enerji mənbələrindən geniş istifadə edilsin. Muxtar respublika ərazisində günəşli saatların orta illik miqdarının 2600-2800 saat təşkil etməsi günəş elektrik stansiyasının Naxçıvanın enerji təhlükəsizliyinə mühüm bir töhfə olacağına zəmanət verib. Naxçıvanda hər kvadratmetrə düşən günəş enerjisinin intensivliyi 0,8-1,2 kVt-saata bərabərdir.