Azərbaycan, Ağstafa / Trend müxbir N.Fətullayeva/ Azərbaycanın Ağstafa rayonunda vitaminlə zənginləşdirilmiş yem istehsal edən zavod inşa ediləcək, zavodda həmçinin bir sıra kənd təsərrüfatı məhsulları da istehsal olunacaq. Müəssisə tullantısız istehsal sahəsinə aid olacaq. Bu barədə rayon İcra Hakimiyyətinin rəhbəri Cümşüd Musayev bildirib.
"Burada əsasən quşçuluq və heyvandarlıq üzrə yem və müxtəlif fraksiyalı spirtlərin istehsal edilməsi nəzərdə tutulub" - deyə Musayev qeyd edib.
Müəssisəni taxıl, çuğundur və digər bu kimi kənd təsərrüfatı məhsulları ilə təmin etmək üçün 22 min hektar torpaq sahəsi lazımdır. Müəssisənin tikintisinə ilkin olaraq 8 milyon manat vəsait ayrılıb ki, onun artıq 5,5 milyon manatı sərf olunub.
İcra başçısını sözlərinə görə, müasir avadanlıqlarla təchiz olunacaq zavod Ağstafa fermerlərinin lazımi kənd təsərrüfatı texnikası, toxum və kübrə ilə təmin edilməsində də yardımçı olacaq.
Zavodun inşasının gələn ilin sonunadək yekunlaşacağı planlaşdırılıb.
Tam avtomatlaşdırılacaq müəssisədə 420 nəfər daimi işçinin çalışacağı gözlənilir.
