Azərbaycan, Bakı, 26 may / Trend , müxbir U.İsmayılova/ Bakının ilkin daşınmaz əmlak bazarında qiymətlər mart ayına nisbətdə apreldə təxminən 1,4 faiz artıb. Bu barədə bazar ertəsi "Əmlak bazarı iştirakçıları" İctimai Birliyindən məlumat verilib.
Bakının ilkin bazarında bir kvadrat metrin orta qiyməti aprel ayında 1091 dollar təşkil edib. Ay ərzində ən nəzərəçarpacaq qiymət artımı Sabunçu rayonunda - 6,6 faiz müşahidə olunub.
Şəhərin mərkəzi zonasında təklif olunan evlərin əksəriyyətini beş otaqlı mənzillər, üçüncü zonada isə bir otaqlı mənzillər təşkil edib. Aprel ayında Bakının ilkin bazarında təkliflərin əksəriyyətini üç otaqlı mənzillər təşkil edib.
Aprel ayında yeni tikililərdə təklif olunan mənzillərin orta sahəsi 121,4 kvadrat metr təşkil edib ki, bu da mart ayına nisbətdə 0,2 faiz azdır.
Aprel ayında bazara təklif olunan mənzillərin ümumi cədvəli:
| Otaqlar | Say | Sahənin orta göstəricisi | Ümumi tikintidə pay faizlə |
| 1-otaqlı | 6968 | 58,7 | 15 |
| 2- otaqlı | 19977 | 92,6 | 31 |
| 3- otaqlı | 25751 | 136,8 | 40 |
| 4- otaqlı | 8298 | 182,2 | 13 |
| 5- otaqlı | 774 | 229,4 | 1 |
Aprel ayında ilkin bazarda 580 bina tikilib və istifadəyə verilib. Tikinti şirkətlərinin sayı 216 təşkil edib. Binaların əksəriyyəti (24 faiz) Bakının Yasamal rayonunda inşa edilib.