Azərbaycan, Bakı, 10 iyun/ Trend , müxbir Ü.İsmayılova/ Azərbaycanın iri sığorta şirkətlərindən biri MBASK mayın yekunları üzrə bütün tarixi ərzində rekord həcmdə sığorta haqqı toplayıb. 2007-ci ilin yanvar-may ayları ərzində MBASK-ın sığorta haqları 3 268 401 manat təşkil edirdisə, şirkət yalnız ötən ay ərzində 2 585 250 manat toplayıb və bu, ötənilki göstəricilərdən 156 faiz çoxdur. Bu barədə çərşənbə axşamı şirkətdən məlumat veriblər.
MBASK SŞ İdarə Heyətinin sədr müavini Rəşad Abbasovun sözlərinə görə, belə yüksək artımın səbəbi müştərilərə göstərilən xidmətlərin keyfiyyət standartlarının daimi olaraq artırılması nəticəsində şirkətin müştəri bazasının genişlənməsi, həm də şirkətin keyfiyyətli inkişafı məqsədi ilə birləşmiş komandanın, vahid peşəkarlar kollektivinin effektli və məhsuldar işi olub.
MBASK mayda ümumi məbləği 339 032 manat olmaqla 118 sığorta ödəməsi həyata keçirib.
May ərzində şirkətin ən iri ödəməsi avtomobil sığortasına dair müqavilə çərçivəsində həyata keçirilib və 82 712 manat təşkil edib.
Azərbaycanın sığorta bazarında 1992-ci ildən fəaliyyət göstərən MBASK SŞ 29 növ sığorta xidməti göstərir ki, onlardan 4-ü məcburidir. Şirkətin Nizamnamə kapitalı 2 mln. manatdır. 2005-ci ilin yanvarından etibarən MBASK-ın səhmlərinin 30 faizi Avropa Yenidənqurma və İnkişaf Bankına məxsusdur.
Müəlliflə əlaqə saxlamaq üçün elektron ünvan: [email protected]
