Azərbaycan, Bakı, 18 iyun / Trend , U.İsmayılova / Yanvar-may aylarında Azərbaycanda ÜDM ötən ilin analoji dövr göstəricisi ilə müqayisədə 14,6 faiz artıb. Bu barədə çərşənbə günü Dövlət Statistika Komitəsindən məlumat verilib. Cari qiymətlərdə ÜDM göstəricisi 14308,6 mln. manat təşkil edib. Adambaşına düşən ÜDM həcmi 13,2 faiz artaraq 1677,6 manat ($2003,8) təşkil edib.
İqtisadiyyatın bütün sahələrində məhsulun ümumi istehsal həcmi ÜDM-də 69,8 faiz təşkil edib. Burada böyük hissə - 66,7 faiz (9539,1 mln. manat) sənayenin payına düşür. ÜDM-də xidmət sahələrinin payı 18,4 faiz təşkil edir. Xidmət sahəsində əlavə dəyər istehsalı ötən ilin analoji dövr göstəricisi ilə müqayisədə 10,1 faiz artıb. Məhsul və idxaldan gələn təmiz vergi ÜDM-də 7,6 faiz təşkil edib.
Bu dövr ərzində kənd təsərrüfatı, ovçuluq sektoru və meşəçilik təsərrüfatında 277,8 mln. manat əlavə dəyər istehsal olunub, bu da ümumi ÜDM-in 1,9 faizini təşkil edir. Bu göstərici tikinti sektorunda - 770,4 mln. manat (5,4 faiz), nəqliyyat sektorunda - 550,4 mln. manat (3,8 faiz), rabitə sektorunda - 209,1 mln. manat (1,5 faiz), topdan və pərakəndə ticarət, avtomobil sahəsində, məişət əşyaları və şəxsi istifadə əşyalarının təmiri üzrə xidmət sahəsində - 784 mln. manat (6,7 faiz), restoran ve mehmanxana sektorunda - 129,6 mln. manat (0,9 faiz), sosial və digər xidmətlərin göstərilməsi sahəsində - 955,1 mln. manat (6,7 faiz) təşkil edib.
Müəlliflə əlaqə üçün ünvan : [email protected]
