Azərbaycan, Bakı, 21 avqust/ Trend , müxbir İ.Xəlilova/ Azərbaycanın Vergilər Nazirliyinin məlumatına əsasən, 2008 - ci lin yanvar-iyul ayları ərzində dövlət büdcəsinə 11 daxilolmadan yalnız bir vergi növü - gəlir vergisi üzrə proqnoz göstəriciləri yerinə yetirilməyib, - cümə axşamı nazirlikdən bildiriblər. Vergilər Nazirliyinin xətti ilə doqquz vergidən əlavə, dövlət rüsumu və digər daxilolmalar da ( onların arasında neftin ixrac və daxili qiyməti arasındakı fərqdən və dövlət mülkiyyətində olan torpaqların icarə ödənişlərindən daxilolmalar var) yığılır.
Vergi daxilolmalarında ən yüksək xüsusi çəki mənfəət vergisi üzrə qeydə alınıb ki, bu da 2006 - cı ildə Bakı - Tbilisi - Ceyhan ƏİB-in istismara verilməsi və bu vergi üzrə podrat subpodrat şirkətlərin ödənişləri ilə bağlıdır. Hesabat dövrü ərzində mənfəət vergisi üzrə ödənişlər 2 179,777 mln. manat olub və proqnoz 120,8 faiz yerinə yetirilib.
Xüsusi çəkisinə görə ikinci yerdə ƏDV üzrə daxilolmalardır və 617,852 mln. manat təşkil edib. Proqnoz 106,4 faiz yerinə yetirilib. Fiziki şəxslərin gəlir vergisindən dövlət büdcəsinə 350,809 mln. manat ödənilib ki, bu da proqnozlaşdırılan həcmdən 18,5 faiz azdır.
Hesabat dövrü ərzində aksiz vergisi üzrə daxilolmalar 206,429 mln. manat təşkil edib ki, bu da proqnozdan 1 faiz çoxdur. Yeraltı sərvətlər vergisi üzrə proqnoz 114,7 faiz yerinə yetirilib, büdcəyə 88,049 mln. manat daxil olub. Əmlak vergisi üzrə büdcəyə 62,86 mln. manat ödənilib ki, bu da 1,7 faiz çoxdur. Sadələşdirilmiş vergi sistemi üzrə daxilolmalar 101,5 faiz yerinə yetirilib və 36,236 mln. manat təşkil edib. Torpaq vergisi üzrə daxilolmalar 38,2 faiz artıb və 23,372 mln. manata çatıb. Yol vergsi üzrə büdcəyə 15,033 mln. manat ödənilib ki, bu da proqnozdan 1,9 faiz çoxdur.
Dövlət rüsumları xətti üzrə proqnoz göstəriciləri 119,5 faiz - 35,392 mln. manat yerinə yetirilib. İcarə ödənişindən daxilolmaların 39 faiz icra edilməsinə baxmayaraq, digər daxilolmalar xətti üzrə 138,12 mln manat alınıb və proqnoz 118 faiz yerinə yetirilib.
Ümumilikdə, yeddi ay ərzində Vergilər Nazirliyinin xətti üzrə proqnoz 111,3 faiz yerinə yetirilib və büdcəyə 3 372,84 mln. manat proqnoza qarşı 3 753,929 mln. manat daxil olub.
2008-ci ildə Nazirlik üçün proqnoz 5,38 mlrd. manat səviyyəsində müəyyən edilib.
Avqustun 21-nə olan rəsmi məzənnə -- 0,8137 AZN/USD
Müəlliflə əlaqə saxlamaq üçün elektron ünvan: [email protected]