Azərbaycan, Bakı, 02 sentyabr/ Trend , müxbir İ.Xəlilova/ "Əcnəbi sərmayədarların Azərbaycanın informasiya-kommunikasiya sektoruna marağı artıb ki, bu da bazarda yüksək artım templəri ilə əlaqədardır", - rabitə və informasiya texnologiyaları naziri Əli Abbasov çərşənbə axşamı bildirib.
Son beş ildə həm daxili, həm də xairci sərmayələr hesabına, KT sektoruna, orta hesabla, 200-250 mln. manat vəsait yatırılıb. Vəsaitlərin əsas hissəsi xarici sərmayələrin payına düşür.
"Son beş ildə bu sektorda orta illik artım templəri 35-37 faiz olub", - nazir bildirib.
Artan maraq bazarın liberallaşması ilə izah olunur ki, bu həmin dövrdə bazarda 200 yerli və xarici şirkətin yaranmasına səbəb olub.
Nazirin rəyinə görə, Azərbaycanın rabitə sektoruna marağın artmasının üçüncü səbəbi Regional İnnovasiya Zonasının (RİZ) yaradılmasıdır.
"Azərbaycan bazarının kiçik olmasına baxmayaraq, bu layihə regional bazarlar üçün mal və xidmətlər istehsal etməyə imkan verəcək, - Abbasov bildirib. - Layihənin realizəsi çərçivəsində vergi və gömrük siyasətinin sadələşdirilməsi nəzərdə tutulur, sərmayələrin müdafiəsi üçün güzəştlər tətbiq ediləcək".
Onun sözlərinə görə, hazırda Azərbaycan bazarına həm ölkə ərazisində, həm də regional bazarlarda fəaliyyət göstərmək niyyətində olan çoxlu şirkət gəlir.
RİZ layihəsi kiçik və orta innovasiya sahibkarlığının inkişafı üçün texnoparkların, elektron avadanlıq və proqram məhsullarının istehsalı və ixracı üzrə regional bazanın yaradılmasını, ölkənin sərfəli tranzit informasiya mərkəzinə (Data Centre) çevrilməsini, formalaşan informasiya cəmiyyəti üçün insan resurslarının hazırlanması və inkişafını, müxtəlif sahələrdə tətbiqini nəzərdə tutur.
Yeni layihə 2012 - ci ilə rabitə sahəsində gəlirləri ildə $4 mlrd.- dək artırmağa imkan verəcək. 2018 -2020 - ci illərdə isə, bu rəqəm neft gəlirlərinin səviyyəsinə çata və $10-12 mlrd. təşkil edərək, artmaqda davam edə bilər.
Sentyabrın 2-nə olan cari mübadilə məzənnəsi -- 0,8144 AZN/USD.
Müəlliflə əlaqə saxlamaq üçün elektron ünvan [email protected]
