Azərbaycan, Bakı, 08 sentyabr/ Trend , müxbir İ.Xəlilova/Azərbaycan və Özbəkistan hökumətləri 2001-2010 - cu illəri əhatə edən iqtisadi əməkdaşlıq üzrə uzunmüddətli proqrama düzəlişlər etmək barədə qərar qəbul ediblər, -Azərbaycanın Nazirlər Kabinetindən bazar ertəsi bildiriblər. Bu təklif sentyabrın 5 - də Bakıda keçirilən Azərbaycan - Özbəkistan hökumətlərarası komissiyasının VIII iclasında səsləndirilib.
Ölkələrdəki iqtisadi proseslər, baş verən dəyişikliklərlə əlaqədar belə zərurət yaranıb ki, bu da qarşılıqlı münasibətlərin inkişafına təsir etməlidir. Ümumilikdə komissiya 2004 - cü ildə keçirilən əvvəlki iclasın protokolunda müəyyən edilən tədbirlərin icrasını normal qiymətləndirib.
Komissiya neft - qaz, nəqliyyat (TRASEKA çərçivəsində) sahələrində əməkdaşlığın inkişafını, xüsusilə də aqrar sənaye kompleksi sahəsində müqavilə-hüquq bazasının genişləndirilməsinin zəruri olduğunu qeyd edib.
2008 - ci ilin birinci yarımilinin yekunlarına əsasən, Azərbaycan və Özbəkistan arasında xarici ticarət dövriyyəsi $12,142 mln. təşkil edib, bunun $4,34 mln.-u ixrac əməliyyatlarının payına düşür.
Komissiyanın iclasında iştirak etmək üçün Özbəkistanın Baş nazirinin müavini Nodirxon Xanovun başçılıq etdiyi özbək hökumət nümayəndə heyəti Bakıya gəlib. Komissiyanın Azərbaycan hissəsinə Baş nazirin müavini Yaqub Eyyubov başçılıq edir. Səfər çərçivəsində Bakıda GM-Uzbekistan şirkətinin nümayəndəliyinin - "UzDeuBakuAvto"nun rəsmi açılışı keçiriləcək. Nümayəndəlik Özbəkistanda istehsal olunan Deu markalı avtomobillərin satışı ilə məşğul olacaq.
Müəlliflə əlaqə saxlamaq üçün elektron ünvan - [email protected]