Azərbaycan, Bakı, 02 oktyabr/ Trend , müxbir E.İsmayılov/ Bakı metropoliteni ay ərzində qatarların hərəkəti arasında intervalı son 15 il ərzində ən minimal səviyyəyə - 2 dəqiqəyədək azaltmağı planlaşdırır, - Bakı metropolitenindən cümə axşamı bildiriblər.
Yeni rejimin tətbiqi gərginliyi və metro stansiyalarında sərnişinlərin yığılmasını azaltmağa imkan verəcək.
Sentyabrın 15 - dən metropolitenin qış iş rejiminə keçməsindən sonra bu interval iki dəqiqə yarım, yay vaxtlarında isə 3 dəqiqə təşkil edir.
"Hazırda vaxt intervalı iki dəqiqə yarım təşkil edir. Lakin iki həftə sonra metropoliten yeni rejimə keçəcək və bu rejimdə interval cəmi iki dəqiqə olacaq", - Bakı metropoliteninin nümayəndəsi bildirib.
Bəzi stansiyalar və sürət məhdudiyyətlərinin olduğu metro sahələrində texniki işlər aparılır. İşlərin əsas məqsədi bu sahələrdə qatarların hərəkətini artırmaqdır.
Hazırda qatarların yeni hərəkət intervalına müvafiq olaraq, Bakı metropoliteninin yeni iş rejimi hazırlanır. "Biz yeni qrafiki oktyabrın 15 - dək hazırlayıb başa çatdırmalıyıq. Bundan sonra onun tətbiqi barədə qərar qəbul ediləcək", - mənbə bildirib.
Qatarların metro stansiyalarında dayanma müddət,i stansiyalardan və sərnişinlərin ona olan tələbatından asılı olaraq, 20-45 saniyə civarında dəyişir. Hər gün metropoliten dörd-beş qatarda profilaktik təmir işlər aparır. Profilaktik yoxlamalar və təmir işləri sərnişin daşınmalarının təhlükəsizliyini təmin etmək üçün aparılır.
Azərbaycanın Nəqliyyat Nazirliyinin Bakıda hərəkətin gərginliyinin azaldılması məqsədilə şəhərin mərkəzi küçələrində aztutumlu avtobusların hərəkətinə qoyduğu qadağa metropolitendə sərnişinlərin sayının artmasına cüzi təsir göstərib. "Bundan sonra metroda sərnişinlərin sayı 2 faizdən çox artmayıb", - mənbə bildirib.
Bir həftə əvvəl Nəqliyyat Nazirliyi paytaxtın mərkəzi küçələri ilə aztutumlu avtobusların hərəkətinə qadağa qoyub. Bu avtobusların şəhər ətrafında və Bakının mərkəzi küçələrindən kənarda hərəkətinə hələ ki icazə verilir. Proses tədricən tətbiq ediləcək.
Bakı metropoliteni 1967 - ci ildən fəaliyyət göstərir (üç aralıq stansiya ilə "İçəri şəhər" stansiyasından "Nəriman Nərimanov" stansiyasınadək). Metropolitenin yeddi stansiyası ("İçəri şəhər", "Sahil", "Cəfər Cabbarlı", "Xətai", "Nizami", "Elmlər Akademiyası" - dərin enişli, "Bakmil" - yerüstü, qalanları isə, kiçik enişli sütunludur (cəmi 20 stansiya).
Müəlliflə əlaqə saxlamaq üçün elektron ünvan: [email protected]
