Azərbaycan, Bakı, 27 oktyabr/ Trend , müxbir N.İsmayılova/ "Avropa Yenidənqurma və İnkişaf Bankı (AYİB) Neftçalada yod istehsalı üzrə zavodun istehsalının genişləndirilməsinə 10 mln. avro məbləğində kredit ayırmağı planlaşdırır", - AYİB - in Bakı nümayəndəliyinin rəhbəri Frensis Deley bazar ertəsi bildirib.
"Biz bu sazişi ilin sonuna başa çatdırmağı planlaşdırırıq", - Deley vurğulayıb.
Yod zavodu ISR Holding-in qrupuna daxildir. Holdinqin rəhbəri İsgəndər Xəlilov əvvəllər bildirib ki, hazırda hazır məhsul istehsal edən bir xətt işə salınıb.
"Layihə üzrə işlərin ikinci fazasının realizəsi daha iki xəttin istismara verilməsini nəzərdə tutur və ikinci faza üzrə işlərin davamı üçün AYİB - in kredit xəttinin açılmasını gözləyirik", - Holdinq rəhbəri bildirib.
Bu gün zavodun ərazisi təxminən 17 hektardır. Ötən dövr ərzində əsas istehsal sahələri və yardımçı obyektlər bərpa edilib. Bu obyektlərdə yodlu-bromlu lay sularının emalı üçün ən müasir avadanlıq quraşdırılıb, xammal materialların emalı üçün qabaqcıl texnologiyalar tətbiq edilib. Ötən ilin mayında zavodda havanın desorbsiyası yolu ilə yod istehsalı üzrə unikal avadanlıq quraşdırılıb. Onun yalnız birinci növbədə gücü ildə 50 tona bərabərdir və 94 faizədək təmiz məhsul verir.
İstehsal tullantılarının təkrar emalı üçün zavodda quraşdırılan qurğu atmosferin çirklənməsi hallarının qarşısını almaqdan əlavə, əlavə məhsul almaq imkanı verir.
Zavodun birinci növbəsi ildə təxminən 250 ton məhsul almağa hesablanıb, hazırda burada 200 - dən çox çalışır. Ümumilikdə müəssisənin tam layihə gücü ildə 500 ton yoda bərabərdir. Bu məqsədə çatmaq üçün sutkada emala 40 min ton kubmetr lay suyu vurmaq lazımdır.
AYİB-in 8,5 mln. dollar məbləğində ilk krediti istehsalın xammala - lay suları ilə təmin edilməsi və ümumi sahəsi 550 hektar olan yodlu - bromlu yatağın işlənilməsi məqsədilə ayrılıb.
Neftçala və Xızı sahələrində təxminən 200 quyu öyrənilib, onlardan 140- ı istismara yararlı hesab edilib. Zavodun birinci növbəsi çərçivəsində, üçüncü və dördüncü istehsal xətlərinin tikintisi nəzərdə tutulur. Müəssisənin fasiləsiz elektrik enerjisi ilə təminatı üçün 8 MVt gücündə modul qaz generatorunun quraşdırılması planlaşdırılır.
Ümumdünya Səhiyyə Təşkilatının məlumatlarına əsasən, hər il dünyada bir milyarddan çox insan orqanizmdə yod çatışmazlığından əziyyət çəkir. 750 mln. insan zob diaqnozu ilə yaşayır, 43 mln. uşaq əqli inkişafda geri qalır.
Müəlliflə əlaqə saxlamaq üçün elektron ünvan: [email protected]