Azərbaycan, Bakı, 07 noyabr/ Trend , müxbir İ.Xəlilova/ Azərbaycan hökuməti istehsalın stimullaşdırılması məqsədilə kənd təsərrüfatı məhsulları istehsalçıları üçün vergi güzəştlərini daha beş il müddətinə uzatmağı təklif edir, - maliyyə naziri Samir Şərifov cümə günü parlament komissiyalarının gələn ilin dövlət büdcəsinin müzakirəsinə həsr olunmuş birgə iclasında bildirib.
"Kənd təsərrüfatı məhsulları istehsalçılarının torpaq vergisi istisna olmaqla, bütün vergilərin ödənilməsindən azad edilməsi onların maddi rifahını yaxşılaşdırmağa imkan verəcək", - Şərifov bildirib.
Güzəştlər, kənd təsərrüfatı məhsullarının istehsalı sahəsində çalışan hüquqi və fiziki şəxslər üçün vergi tətillərinin tətbiqini nəzərdən tutan 2001-ci il 27 yanvar tarixli Qanunun müddətinin başa çatması ilə əlaqədar, 2009-cu il yanvarın 1-dən tətbiq ediləcək.
Bu tədbirlər Azərbaycan hökumətinin bu gün bütün dünyada aktual məsələ olan ərzaq təhlükəsizliyi üzrə Dövlət Proqramı çərçivəsində görülən tədbirlərin bir hissəsidir, - nazir bildirib. Aqrar-sənaye kompleksi subyektlərinə Azərbaycan prezidentinin 2007-ci il 27 yanvar tarixli sərəncamı çərçivəsində, müxtəlif formalarda yardım göstəriləcək. İstehsalçılara mineral gübrələr, yanacaq - sürtkü yağlarının dəyərinin 50 faizinin ödənilməsi üçün subsidiyalar təqdim edilib. Taxıl istehsalına maddi yardım üçün hər ha əkin sahəsinə 40 manat təqdim edilib. Bu proses gələn il də davam etdiriləcək.
Bu tədbirlərin tətbiqi nəticəsində, 2007-ci ilin yekunları üzrə Azərbaycanda dənli bitkilərin istehsalı təxminən 1,7 mln. ton təşkil edib və ümumilikdə Azərbaycanda kənd təsərrüfatının inkişafı sürətlənib. 2008 - ci ilin doqquz ayı ərzində ölkənin aqrar sektorunda 8,7 faiz artım buna dəlalət edir.
Müəlliflə əlaqə saxlamaq üçün elektron ünvan: [email protected]