Azərbaycan, Bakı, 11 noyabr/ Trend , müxbir N.İsmayılova/ "Bank Melli Iran-ın Azərbaycan filialı depozit portfelinin artırılması məqsədilə, bankın siyasətinə dəyişikliklər etməyə hazırlaşır", - bankın rəhbərinin müavini Anar İbrahimov çərşənbə axşamı bildirib.
"Bankın əvvəlki rəhbərliyi depozitlərə dair başqa siyasət aparırdı və bu, depozit portfelinin azalmasına gətirib. Hazırda biz onu ən azı beş milyon dollaradək artırmağı planlaşdırırıq", - İbrahimov bildirib.
Onun sözlərinə görə, Bank Melli Iran potfelin artırılması üçün vəsaitləri faiz dərəcəsi daha münasib olan banklardan cəlb etmək niyyətindədir.
Hazırda bankın depozit portfeli 2,36 mln. manat təşkil edir.
Bankın depozitlər üzrə cari dərəcələri Avropa valyutasında əmanətlər üçün 3 faizdən doqquz faizədək, dollar və manat əmanətləri üçün altı faizdən 14 faizədək dəyişir.
Bank Melli Iran Bakıda yalnız bir filialla təmsil olunsa da, bankın dünyada geniş filial şəbəkəsi var.
2008 - ci il noyabrın 1-nə olan vəziyyətə görə bankın aktivləri 18,51 mln. manat, Nizamnamə kapitalı 10 mln. manat, məcmu kapitalı 11,28 mln. manat, kredit portfeli 6,37 mln. manat təşkil edib. 10 ay ərzində bankın mənfəəti 1,15 mln. manat təşkil edib.
Noyabrın 11-nə olan cari mübadilə məzənnəsi -- 0,8085AZN/USD.
Müəlliflə əlaqə saxlamaq üçün elektron ünvan: [email protected]
