Azərbaycan, Bakı, 18 noyabr/ Trend , müxbir E.İsmayılov/ "Yaxın vaxtlarda Ukraynadan Azərbaycana təqribən 100 min ton ərzaq buğdası tədarük olunacaq", - deyə çərşənbə axşamı Ukraynanın Azərbaycandakı səfiri Boris Klimçuk bildirib.
"Sizin olduqca yaxşı məhsulunuz vardi, lakin işlərinizin daha stabil olması üçün yaxın həftə və aylarda Azərbaycana təqribən 100 min ton buğda satılacaq", - deyə Klimçuk bildirib.
Azərbaycan Qazaxıstan, Rusiya və Ukraynadan buğda idxal edir. Ümumilikdə yanvar - sentyabr ərzində respublikaya 790 min ton buğda gətirilib ki, bu da ötən ilin analoji dövr göstəricisindən 13,9 faiz azdır. 2008 - ci ilin doqquz ayı ərzində 240 mln. dollar məbləğində buğda idxal olunub ki, bu da 2007 - ci ilin analoji dövr göstəricisi ilə müqayisədə 46,6 faiz çoxdur.
Cari ilin noyabrın 1-nə olan vəziyyətə görə, Azərbaycanda taxıl və taxıl vəpaxlalı bitkilər istehsalı hökumətin proqnozlaşdırdığı kimi, rekord həddə çatıb. Taxıl istehsalının həcmi (Qarğıdalı da daxil olmaqla) 2,5 mln. tona çatıb ki, bu da 2007-ci ilin göstəricisindən 492 min ton artıqdır.
Azərbaycanın illik taxıl tələbatı üç mln. tondur, onun bir mln. tonu idxal olunur.
Ölkənin Kənd Təsərrüfatı Nazirliyi yaxın illərdə yerli istehsal hesabına ərzaq taxılına olan daxili tələbatın tam ödəniləcəyini proqnozlaşdırır.
Məqalə müəllifi ilə əlaqə ünvanı - [email protected]