Azərbaycan, Bakı, 20 noyabr/ Trend , müxbir S.Babayeva/ Avropa Yenidənqurma və İnkişaf Bankının (AYİB) Direktorlar Şurası 2009-cu il yanvarın 27-də Azərbaycanda ən iri sement istehsalçısı Garadagh Cement-in istehsal obyektlərinin genişləndirilməsinə əlavə maliyyələşdirmənin ayrılmasını təsdiq edəcək.
Maliyyələşdirmənin həcmi yanvar görüşündə dəqiqləşdiriləcək, - AYİB-in Bakı nümayəndəliyindən cümə axşamı bildiriblər.
Zavodun əsas səhmdarı Holcim Group-un Direktorlar Şurası ötən ilin sentyabrında Garadagh Cement zavodunun dəyəri 300 mln. dollar olan müasirləşdirilməsi layihəsini təqdir edib. Holcim Group layihə üçün sərmayələrin çox hissəsini öz üzərinə götürəcək.
Layihəyə mövcud zavodun 80 faizinin yenidən qurulması və müəssisədə yeni sobanın quraşdırılması daxildir. Garadagh Cement mövcud rütubətli sobaları müasirləşdirməyi və onları müasir quru sement texnologiyası ilə əvəz etməyi planlaşdırır.
"2011-ci ildə yeni soba quraşdırıldıqdan sonra müəssisədə sement istehsalının ümumi həcmini ildə 1,7 mln. tonadək artırmaq mümkün olacaq", - şirkətin rəhbəri Xoriya Adrian əvvəllər bildirib.
İsveçrənin Holcim şirkəti Garadagh Cement-i 1999-cu ildə özəlləşdirib. Zavodun səhmlərinin 69,4 faizi Holcim-ə, 10 faizi AYİB-ə, 10,6 faizi kiçik səhmdarlara, 10 faizi Azərbaycan İnvestisiya Şirkətinə məxsusdur.
Müəlliflə əlaqə saxlamaq üçün elektron ünvan: [email protected]
